Wedi ei bostio ar Dydd Iau 18 Rhagfyr 2025
Mae cyfraddau ailgylchu gwastraff bwyd wedi codi eto diolch i’r trigolion hynny sydd wedi cymryd rhan yn ymgyrch Cystadlu â’ch Cymdogion y Cyngor.
Ym mis Tachwedd 2025, cododd cyfraddau ailgylchu gwastraff bwyd chwech y cant o gymharu â mis Tachwedd 2024, a gostyngodd cyfraddau gwastraff biniau â chlawr porffor naw y cant.
Ers mis Medi, mae swyddogion addysg a gorfodi ailgylchu wedi bod yn dosbarthu llyfrynnau Cystadlu â’ch Cymdogion ac yn cynghori trigolion am sut i leihau’r gwastraff yn eu biniau â chlawr porffor.
Meddai’r Cynghorydd Sue Morgan, yr Aelod Gweithredol dros Gynaliadwyedd a Gwastraff: "Hoffem ddiolch i drigolion am gefnogi ymgyrch Cystadlu â’ch Cymdogion, ac ailgylchu mwy nag y maent wedi'i wneud o'r blaen. Maen nhw wedi profi i ni unwaith eto eu bod yn ailgylchwyr brwdfrydig.
"Mae'n wych clywed gan y tîm ymgysylltu fod rhai pobl sydd ddim erioed wedi ailgylchu gwastraff bwyd o'r blaen nawr yn rhoi tro arni.
"Mae gwastraff bwyd wedi bod yn gyfran fawr o’r gwastraff yn y biniau â chlawr porffor erioed, felly rydyn ni wrth ein boddau i weld mwy ohono’n cael ei roi allan i'w ailgylchu."
Bydd y tîm ymgysylltu a gorfodi yn parhau i fonitro biniau â chlawr porffor ac i gynnig cyngor i aelwydydd sydd â biniau gorlawn neu fagiau sbwriel ychwanegol.
Os na fydd trigolion yn gwneud unrhyw newidiadau, gallent gael llythyr o rybudd ac, yn y pen draw, Hysbysiad Cosb Benodedig o £100.
Cewch ragor o wybodaeth am Bolisi Addysg a Gorfodi Gwastraff y Cyngor ar ein gwefan.
Darganfyddwch beth allwch chi ei ailgylchu ar garreg eich drws
Angen bocsys neu fagiau ailgylchu ychwanegol?
Dewch o hyd i'ch hwb ailgylchu agosaf
Mae Canolfan Ailgylchu Gwastraff y Cartref ar agor saith niwrnod yr wythnos. Cofiwch wahanu eich deunydd i’w hailgylchu a’ch sbwriel.