Wedi ei bostio ar Dydd Gwener 27 Mawrth 2026
Cynhaliwyd cyngerdd am ddim yr wythnos ddiwethaf i nodi 25 mlynedd ers cofrestru Blaenafon yn Safle Treftadaeth y Byd UNESCO.
Daeth tua 300 o bobl i’r digwyddiad a gynhaliwyd yn Neuadd y Gweithwyr Blaenafon.
Yn ystod y gyngerdd cafwyd perfformiadau gan Gôr Meibion Blaenafon, Band Tref Blaenafon, Cwmni Theatr Adhoc, Llysgenhadon Ieuenctid Treftadaeth y Byd a phlant ysgol o Ysgol Gynradd Wirfoddol a Reolir Treftadaeth Blaenafon.
Daeth Tirwedd Ddiwydiannol Blaenafon yn Safle Treftadaeth y Byd ym mis Rhagfyr 2000, i gydnabod ei thirwedd cynhyrchu haearn a glo o'r 19eg ganrif, sydd wedi'i chadw'n dda ac sy’n cynnwys tref Blaenafon.
Ers hynny, mae statws UNESCO Blaenafon wedi helpu i drawsnewid yr ardal, gan ddenu cannoedd o filoedd o ymwelwyr a mwy na £50 miliwn o fuddsoddiad.
Mae statws Treftadaeth y Byd UNESCO yn rhoi Blaenafon ar lwyfan y byd ochr yn ochr â safleoedd trawiadol eraill fel Ynysoedd y Galapagos a'r Taj Mahal.
Roedd y gyngerdd yn cynnwys atgofion y rheiny a oedd yn allweddol yn y broses o gael yr ardal wedi ei chydnabod yn swyddogol ac roedd yn dathlu'r effaith y mae hynny wedi ei chael ar y dref yn ystod y cyfnod hwnnw.
Mae Safle Treftadaeth y Byd Tirwedd Ddiwydiannol Blaenafon yn cynnwys Gwaith Haearn Blaenafon, Big Pit Amgueddfa Lofaol Cymru a'r dirwedd ddiwydiannol ehangach.
Ym mis Rhagfyr, nododd Cyngor Tref Blaenafon ac Ysgol Gynradd Wirfoddol a Reolir Treftadaeth Blaenafon y 25 mlynedd trwy greu capsiwl amser i ddathlu bywyd ym Mlaenafon heddiw.
I gael rhagor o wybodaeth am hanes diwydiannol Blaenafon, ewch i Safle Treftadaeth Byd Blaenafon