Wedi ei bostio ar Dydd Iau 5 Mawrth 2026
Heddiw, mae ysgolion wedi bod yn dathlu Diwrnod y Llyfr, ac mae hynny’n cynnwys Ysgol Croesyceiliog, lle rhoddwyd llyfr am ddim i gannoedd o ddisgyblion.
Mae'n dilyn rhodd o 600 o lyfrau gan National Literacy Trust, i helpu i hyrwyddo darllen ar draws grwpiau blwyddyn.
Cafodd pob disgybl ym Mlynyddoedd 7 ac 8 docyn Diwrnod y Llyfr, y gallent ei gyfnewid am lyfr o siop lyfrau sionc yn yr ysgol.
Dros y tair blynedd ddiwethaf, mae nifer y geiriau a ddarllenir ar draws y ddau grŵp blwyddyn wedi codi o 28 miliwn i 82 miliwn - gwelliant sylweddol a amlygwyd mewn adroddiad arolygu diweddar gan Estyn.
Yn rhan o'r digwyddiad, rhoddwyd 100 o lyfrau hefyd i ddisgyblion o Ysgol Gynradd Llanyrafon, a fu’n ymweld â Chroesyceiliog wedi’u gwisgo fel eu hoff gymeriadau o lyfrau.
Meddai disgybl o Flwyddyn 1, Aaron, "Rwy’n caru darllen. Fy hoff lyfr yw Fantastic Mr Fox. Rwy'n hoffi'r diweddglo lle maen nhw i gyd yn cael te gyda'i gilydd. “
Meddai disgybl o Flwyddyn 8, Tirion, sydd wedi darllen dros 1 miliwn o eiriau ers defnyddio llyfrgell yr ysgol: "Trwy ddarllen llawer o lyfrau, rydw i wedi gallu dysgu mwy am bynciau gwahanol, yn enwedig mytholeg hynafol a dreigiau. Mae wedi fy helpu i ehangu fy ngeirfa a dod yn fwy hyderus wrth ysgrifennu."
Roedd gweithgareddau eraill yn cynnwys cyfnewid llyfrau yn ystod amser egwyl, cwis dan arweiniad athrawon yn cynnwys dyfyniadau wedi'u recordio o lyfrau poblogaidd, a chystadleuaeth i herio disgyblion i ddylunio cymeriad ar gyfer llyfr gan ddefnyddio eitemau bob-dydd o’r cartref.
Roedd y diwrnod yn tynnu sylw at raglen o’r enw Accelerated Reading, lle mae disgyblion yn cwblhau asesiadau Star Reader i'w paru â llyfrau sy'n addas i'w lefel ddarllen.
Meddai Stacey Mahoney, Pennaeth Llythrennedd yng Nghroesyceiliog:
"Mae'r dathliadau heddiw yn adlewyrchu ffocws cryf ein hysgol ar lythrennedd, gyda disgyblion yn gwneud cynnydd gwych mewn Saesneg a darllen.
"Cynhelir ein gwersi llyfrgell bob pythefnos ac mae nifer dda yn dod, ac mae cwisiau a gweithgareddau sy'n seiliedig ar ddarllen yn parhau i gefnogi lefelau uchel o ymgysylltiad a chyrhaeddiad.
"Mae llyfrgell yr ysgol yn dal i fod yn ganolog i'r dull gweithredu hwn, gan ddarparu lle croesawgar sy'n annog disgyblion i ddarllen yn eang a datblygu eu hyder a'u mwynhad wrth ddarllen."