Wedi ei bostio ar Dydd Iau 18 Mehefin 2026
Yn ystod Wythnos Ymwybyddiaeth Unigrwydd, rydyn ni’n dathlu'r gwirfoddolwyr a'r prosiectau cymunedol sy'n helpu pobl i deimlo cysylltiad a chefnogaeth ac i deimlo ychydig yn llai unig, gan gryfhau llesiant a chydnerthedd cymunedol ar draws Torfaen, yn unol â Bargen Torfaen.
Mae pump menyw o Wcráin sy'n byw yn Nhorfaen wedi iddynt ffoi rhag y rhyfel yn eu mamwlad, wedi bod yn helpu i feithrin cysylltiadau agosach â'r gymuned trwy rannu eu prydau cartref.
Mae’r Clwb Tyfu a Choginio yng nghanolfan Living Waters Centre ym Mhont-y-pŵl, yn cefnogi pobl sydd wedi'u dadleoli ac sy'n byw yn y Fwrdeistref, trwy wella mynediad at fwyd, lleihau ynysu, a dod â phobl at ei gilydd trwy brofiadau cyffredin.
Sefydlwyd y prosiect gan Bartneriaeth Bwyd Torfaen, mewn partneriaeth â thîm ailsefydlu'r Cyngor a Gobaith i'r Gymuned.
Yn y sesiwn gyntaf, croesawyd y menywod o Wcráin, a fu’n paratoi prydau traddodiadol fel Cyw Iâr Kiev a Pampushky Wcreineg - peli bara wedi'u ffrio gyda garlleg, a rannwyd gydag aelodau o'r gymuned leol.
Ar wahân i goginio, rhannodd y menywod y straeon y tu ôl i'r bwyd, gan gynnig cipolwg ar ddiwylliant, traddodiadau a bywyd bob-dydd Wcráin.
Meddai Alla Pylypenko, a gyrhaeddodd Dorfaen trwy'r Cynllun Cartrefi i Wcráin yn 2022: "Roedd coginio gyda'n gilydd yn ein hatgoffa am gartref, ac roedd rhannu ein bwyd ag eraill yn gwneud i ni deimlo croeso mawr. Roedd yn hyfryd gweld pobl yn mwynhau prydau o Wcrain ac yn dangos diddordeb yn ein diwylliant."
Mae canolfan Living Waters Centre, ar Osborne Road ym Mhont-y-pŵl, hefyd yn rhedeg pantri cymunedol a chaffi bob:
- Dydd Mawrth 10am - 1pm
- Dydd Mercher 10am - 1pm
- Dydd Sadwrn 10am - 12pm
Mae'r wythnos hon hefyd yn nodi Wythnos Ymwybyddiaeth Ffoaduriaid, sef adeg i gydnabod cryfder a chydnerthedd ffoaduriaid a dathlu eu cyfraniad yn y cymunedau lle maen nhw'n ymgartrefu.
Mae’r Clwb Tyfu a Choginio yn dangos Bargen Torfaen ar waith - cryfhau partneriaethau rhwng y Cyngor, sefydliadau lleol a thrigolion er mwyn gwella llesiant cymunedol.