Wedi ei bostio ar Dydd Iau 4 Mehefin 2026
Yn ystod #WythnosGwirfoddolwyr yr wythnos hon, rydyn ni’n dathlu ein byddin o wirfoddolwyr rhyfeddol! Rydyn ni’n manteisio ar rym gwirfoddoli yn rhan o Fargen Torfaen. Os hoffech ddiolch i rywun sy'n gwneud gwahaniaeth yn eich cymuned, beth am eu henwebu am wobr gymunedol...
Mae cyfle i enwebu nawr ar gyfer Gwobrau Cymuned a Gwirfoddolwyr blynyddol Torfaen sy’n cael eu cynnal am y chweched tro eleni. Noddir y gwobrau gan sefydliadau a busnesau lleol i ddathlu cyfraniad anhygoel unigolion, grwpiau a gwirfoddolwyr, a chydnabod yr effaith y maent yn ei chael yn ein cymunedau.
Y llynedd, enwebwyd 100 o bobl a grwpiau - gan gynnwys Bois Y Bryn, a enillodd y wobr Celfyddydau, Diwylliant a Threftadaeth, ac Ymddiriedolaeth Camlesi Mynwy, Aberhonddu a'r Fenni, a enillodd y wobr amgylcheddol.
Gallwch enwebu person neu sefydliad ar gyfer un o 12 gwobr:
- Gwirfoddolwr sy’n oedolyn
- Gwirfoddolwr Ifanc
- Ymddiriedolwr y flwyddyn
- Gwirfoddolwr /Grŵp Chwaraeon
- Gwirfoddolwr Iechyd
- Gwirfoddolwr / Grŵp Amgylcheddol
- Calon y Gymuned
- Busnes y Flwyddyn
- Gwirfoddolwr/Grŵp Celfyddydau, Diwylliant a Threftadaeth
- Grŵp Plant a Phobl Ifanc
- Arweinydd Cymunedol
- Cymydog y Flwyddyn
Dywedodd Aimi Morris, Prif Weithredwr Cynghrair Gwirfoddol Torfaen, sy'n trefnu'r gwobrau: "Gwirfoddolwyr yn aml yw'r grym sy’n gefni i gymunedau cryfach, mwy cysylltiedig, ac mae'r gwobrau hyn yn rhoi cyfle i ddathlu eu hymroddiad, cydnabod eu heffaith, ac ysbrydoli eraill i gymryd rhan.
"Mae eu caredigrwydd, eu hymrwymiad a'u hysbryd cymunedol yn helpu i wneud Torfaen yn lle gwell i fyw ac maent yn hanfodol i gyflawni Bargen Torfaen."
Ychwanegodd y Cynghorydd Fiona Cross, Aelod Gweithredol dros Gymunedau: "Gwirfoddolwyr yw asgwrn cefn ein cymunedau. Maent yn helpu i ddod â phobl at ei gilydd, cefnogi'r rhai mewn angen a gwella ein hamgylchedd.
"Mae'r gwaith sy'n cael ei arwain gan ein cymunedau a'r fyddin o wirfoddolwyr, yn ategu at y gefnogaeth a geir gan y cyngor a gwasanaethau cymorth eraill."
Bydd enwebiadau ar gyfer Gwobrau Cymuned a Gwirfoddolwyr Torfaen yn cau ddydd Gwener 31 Gorffennaf. Bydd panel o feirniaid yn dewis tri o bob categori ar gyfer y rownd derfynol a chyhoeddir yr enillwyr ym mis Medi.
Bydd y noson wobrwyo yn cael ei chynnal yng Ngwesty'r Parkway ddydd Gwener 16 Hydref.
Cyngor Torfaen sy’n noddi gwobr Cymydog y Flwyddyn.
Nominations | Torfaen Voluntary Alliance