Gofalwyr maeth yn annog eraill i ystyried maethu pobl ifanc yn eu

Mae pâr o Bont-y-pŵl sydd wedi treulio dros ddegawd yn maethu pobl ifanc yn eu harddegau yn annog eraill i ystyried agor eu cartrefi i blant hŷn.

Daw hyn wrth i'r angen am ofalwyr maeth i bobl yn eu harddegau barhau i gynyddu ledled Cymru.

Cafodd Ellen a Paul eu cymeradwyo fel gofalwyr maeth yn 2014 ac ers hynny maen nhw wedi rhoi gofal i 17 o blant, y mwyafrif ohonynt yn eu harddegau.

Dros y blynyddoedd, maen nhw wedi cymryd pobl ifanc am ofal hirdymor a gofal seibiant, ac ar hyn o bryd maen nhw'n gofalu am ddau yn eu harddegau.

Mewn blog diweddar a rannwyd ar wefan Maeth Cymru Torfaen, mae'r pâr yn esbonio pam mae maethu pobl ifanc yn eu harddegau yn gweithio iddyn nhw a pham y dylai mwy o bobl ei ystyried.

Dywedodd Ellen: "Roedden ni'n chwilio am rywbeth gwahanol, fe welon ni’r hysbysebion ar gyfer maethu a phenderfynu rhoi cynnig arni. Roedd y ddau ohonom eisiau parhau i weithio, felly roedd pobl ifanc yn eu harddegau yn addas i ni.

"Roedd magu pump o blant ein hunain hefyd yn golygu bod gyda ni ddealltwriaeth dda o'r hyn sydd ei angen ar bobl ifanc yn eu harddegau."

Ychwanegodd Paul: "Pan fydd plentyn yn ei arddegau yn dod i aros gyda ni am y tro cyntaf, maen nhw'n aml yn teimlo'n siomedig. Maen nhw’n gallu bod yn fregus, yn ofnus ac mewn lle anodd iawn.

"Ond yr hyn sydd ei angen fwyaf arnyn nhw yw cartref diogel a rhywfaint o sefydlogrwydd ac mae gallu cynnig hynny’n hynod werthfawr."

Ledled Torfaen, mae bron i hanner yr holl blant mewn gofal rhwng 11 a 18 oed, ond mae llawer o bobl ifanc yn eu harddegau yn cael eu gosod mewn lleoliadau preswyl neu gydag asiantaethau maethu annibynnol y tu allan i'w hardal leol oherwydd prinder gofalwyr maeth.

Dywedodd Jason O'Brien, Cyfarwyddwr Strategol Gwasanaethau Plant a Theuluoedd Cyngor Torfaen: "Mae ymroddiad Ellen a Paul dros y blynyddoedd wedi cael effaith barhaol ar gymaint o fywydau ifanc, ac rydym yn hynod ddiolchgar am y gefnogaeth maen nhw'n parhau i'w rhoi.

"Mae pobl ifanc yn eu harddegau yn un o'r grwpiau sydd wedi'u tangynrychioli fwyaf mewn gofal maeth, ac mae gormod o bobl yn dal i gael eu rhoi mewn gofal preswyl neu y tu allan i'r sir.

"Yn Nhorfaen, gall hyn olygu bod pobl ifanc yn cael eu lleoli ymhell o'u hysgolion, eu ffrindiau a'u cymunedau, gan achosi aflonyddwch pellach ar adeg sydd eisoes yn heriol. Mae cynyddu nifer y gofalwyr maeth lleol yn helpu pobl ifanc i gadw mewn cysylltiad â'r bobl a'r lleoedd sy'n bwysicaf iddynt."

I ddarllen stori lawn Ellen a Paul, ewch i wefan Maethu Cymru Torfaen.

Gall unrhyw un sydd â diddordeb mewn dod yn ofalwr maeth gysylltu â thîm maethu'r awdurdod lleol drwy e-bostio fosterwalestorfaen@torfaen.gov.uk neu ffonio 01495 766669.