Wedi ei bostio ar Dydd Gwener 27 Mehefin 2025
Os ydych chi wedi gweld bagiau coch llachar wrth ymyl biniau cyhoeddus, maen nhw'n dangos bod gwirfoddolwyr sbwriel wedi bod yn gweithio yn eich ardal leol.
Mae'r elusen amgylcheddol Cadwch Gymru'n Daclus yn rhoi bagiau sbwriel coch i Gasglwyr Sbwriel cofrestredig, grwpiau cymunedol a Hybiau Casglu Sbwriel i'w gwneud hi'n hawdd eu gwaredu.
Mae gwirfoddolwyr yn gadael y bagiau wrth ymyl biniau cyhoeddus neu mewn mannau sydd wedi'u trefnu ymlaen llaw ac yn rhoi gwybod i'r tîm trwy ap MyTorfaen.
Yn ystod y flwyddyn ddiwethaf, casglwyd 42,821 o fagiau o sbwriel gan wirfoddolwyr o bob cwr o Gymru, a chafodd 3,536 o'r rhain eu casglu yn Nhorfaen trwy gasgliadau sbwriel cymunedol. Mae ysgolion a grwpiau ieuenctid, busnesau, grwpiau cymunedol ac unigolion i gyd yn chwarae rhan yn glanhau eu cymunedau lleol.
Dywedodd Thom Board, Swyddog Prosiect Cadwch Gymru'n Daclus ar gyfer Torfaen: "Rydw i bob amser yn ddiolchgar bod gennym wirfoddolwyr mor ymroddedig yn Nhorfaen, ac mae'n gyffrous gweld mwy o fagiau sbwriel coch yn ymddangos – mae'n dystiolaeth glir o gymuned gynyddol o wirfoddolwyr casglu sbwriel anhygoel."
"Dros gyfnod yr haf, rydym yn gobeithio y bydd pawb yn Nhorfaen yn dechrau deall arwyddocâd y bagiau coch ac yn cael eu hysbrydoli i gymryd rhan mewn gofalu am ein hardal hardd."
Dywedodd Oliver James, Swyddog Atal Sbwriel a Thipio Anghyfreithlon: "Diolch yn fawr iawn i'n holl wirfoddolwyr sy'n casglu sbwriel - mae eich amser, eich egni a'ch gofal yn helpu i gadw Torfaen yn brydferth. Mae pob bag o sbwriel sy’n cael ei gasglu yn arwydd o'ch ymroddiad, ac rydym yn wirioneddol ddiolchgar.
"Mae gwirfoddolwyr Torfaen yn casglu dros 8% o'r holl fagiau sbwriel yng Nghymru sy'n gyflawniad rhyfeddol sy'n dangos pŵer y cyngor a'r gymuned yn gweithio gyda'i gilydd.
"Os hoffech chi gymryd rhan mewn casglu sbwriel, ewch i'ch Hwb Casglu Sbwriel agosaf i gael eich dwylo ar bopeth sydd ei angen arnoch i gymryd rhan."
Ewch i wefan Cadwch Gymru'n Daclus i ddod o hyd i'ch Hwb Casglu Sbwriel agosaf neu'ch grŵp cymunedol amgylcheddol agosaf – www.keepwalestidy.cymru.