Gofal Maeth gan Berthynas

Beth yw Gofal Maeth gan Berthynas?

Mae gofal maeth gan berthnasau, a elwir hefyd yn bobl gysylltiedig neu ofal gan deulu a ffrindiau, yn golygu bod plant nad yw eu rhieni yn gallu gofalu amdanynt yn y tymor byr neu'r tymor hir yn derbyn gofal gan berthnasau eraill, fel neiniau a theidiau, ewythrod neu frodyr a chwiorydd, neu gan oedolion eraill. sydd â chysylltiad â'r plentyn, fel cymdogion neu ffrind agos i'r teulu.

Mewn argyfwng, efallai y bydd aelodau'r teulu'n gallu gofalu am blentyn am gyfnod cyfyngedig gyda chymeradwyaeth dros dro o dan Reoliad 26 y Rheoliadau Maethu.

Darperir hyn ar yr amod bod yr Awdurdod Lleol yn fodlon bod y trefniant hwn yn ddiogel ac yn addas i'r plentyn. Mae asesiad gwahanol ar gyfer hyn, sy'n ystyried a yw'r trefniadau'n addas ac yn ddiogel o dan yr amgylchiadau uniongyrchol.

Dod yn ofalwr maeth sy’n berthynas

Gall yr Awdurdod Lleol ddod yn rhan o'r cam o wneud trefniadau i blentyn / plant dderbyn gofal gan rywun yn eu teulu estynedig neu eu rhwydwaith cymorth.

Rhaid i ofalwyr maeth sy'n berthnasau gael eu hasesu a'u cymeradwyo i fod yn ofalwyr maeth, ond fe'u cymeradwyir i ofalu am blentyn neu blant penodol.

I gael eich cymeradwyo fel gofalwr maeth sy'n berthynas, bydd angen i chi fynd trwy broses asesu a elwir yn Asesiad Person Cysylltiedig.

Mae'r broses hon fel arfer yn cymryd tua 12 -16 wythnos a bydd yn cynnwys cwblhau nifer o ffurflenni, nifer o ymweliadau â'ch cartref a gwiriadau gyda phobl a sefydliadau eraill. Bydd hyn yn cynnwys gwiriadau cofnodion troseddol (gwiriadau DBS), gwiriadau Awdurdod Lleol, tystlythyrau gan bobl eraill, gan gynnwys tystlythyrau addysg, tystlythyrau cyflogaeth a thystlythyrau gan gynbartneriaid a phlant sy'n oedolion. 

Bydd y broses asesu yn caniatáu inni ddod i'ch adnabod chi a'ch teulu ac ystyried yn llawn a fyddwch yn gallu diwallu holl anghenion tymor byr a thymor hir y plentyn / plant, a bydd yn ystyried unrhyw anghenion dysgu neu ddatblygu a allai fod gennych neu gefnogaeth a allai eich helpu yn eich rôl fel gofalwr maeth sy'n berthynas.

Cwestiynau cyffredin

Am beth fydd angen i chi ofyn i mi?

Bydd angen i ni ofyn i chi am eich cefndir a'ch plentyndod, perthnasoedd / priodasau blaenorol a chyfredol, rhwydweithiau cymorth, profiad fel rhiant a'ch perthynas â theulu'r plentyn / plant.

Bydd angen i chi hefyd ddarparu manylion eich incwm, a gofynnir i chi ddarparu manylion fel y gallwn ofyn am dystlythyrau.

Beth fyddwch chi am ei weld pan fyddwch yn ymweld â fy nghartref?

Bydd angen i ni edrych ar y llety rydych chi'n bwriadu ei ddarparu i'r plentyn / plant i sicrhau ei fod yn addas.

Byddwn yn cynnal gwiriad iechyd a diogelwch ar eich cartref, a fydd yn cynnwys asesiad o unrhyw anifeiliaid anwes.

Gyda phwy arall y bydd angen i chi gysylltu?

Bydd angen i ni gysylltu â'ch plant, eich cymar presennol ac unrhyw gymheiriaid blaenorol sy’n arwyddocaol, tystlythyrau personol ac o bosibl rhai aelodau eraill o'r teulu. Bydd angen i ni gysylltu â'ch cyflogwr hefyd.

Os oes gennych blant yn byw gyda chi, bydd angen i ni gysylltu â'u hysgol, ymwelydd iechyd a / neu unrhyw weithiwr proffesiynol sy'n gysylltiedig â nhw.

Pa wiriadau eraill fydd angen i chi eu gwneud?

Bydd yn rhaid i bawb yn eich cartref sydd yn 18 oed a hŷn gael gwiriad datgeliad manwl o gofnod troseddol a elwir yn DBS, sy'n chwilio am euogfarnau troseddol.

Gofynnir i chi lenwi holiadur a chymryd rhan mewn archwiliad meddygol at ddiben maethu gyda'ch meddyg teulu.

A fyddaf yn cael unrhyw gymorth ariannol?

Mae gofalwyr maeth sy'n berthnasau yn gymwys i dderbyn lwfans wythnosol i dalu costau bob dydd a chostau rheolaidd sy'n gysylltiedig â gofalu am blentyn maeth, fel bwyd, dillad, cludiant, gweithgareddau hamdden ac arian poced.

Bydd y lwfans hwn yn dibynnu ar y math o drefniant sydd wedi arwain at yr angen i'r plentyn dderbyn gofal gennych. Mae'r union swm hefyd yn dibynnu ar oedran y plentyn.

Bydd eich asesydd yn trafod trefniadau unigol ar gyfer cymorth ariannol gyda chi yn fwy manwl yn ystod y broses asesu.

Pa gefnogaeth y byddaf yn ei derbyn?

Ar ôl i chi gael eich cymeradwyo fel gofalwr maeth sy'n berthynas, bydd disgwyl i chi gwblhau o leiaf 15 awr o ddysgu a datblygu bob blwyddyn. Mae hyn yn berthnasol i bob gofalwr maeth cymeradwy a'i nod yw eich arfogi â gwybodaeth a sgiliau i'ch helpu chi yn eich rôl.

Byddwch hefyd yn cael cyfle i fynychu grwpiau cymorth misol a chwrdd â gofalwyr maeth eraill mewn swyddi tebyg.

Byddwch yn cael cefnogaeth gan weithiwr goruchwylio o'r Tîm Lleoli Teuluoedd, a fydd yn ymweld â chi'n rheolaidd, o leiaf bob mis yn ystod y flwyddyn gyntaf y cawsoch eich cymeradwyo.

Mae'r gweithiwr hwn yn ychwanegol at weithiwr cymdeithasol y plentyn / plant, a fydd yn ymweld â'r plentyn / plant yn rheolaidd, yn unol â'r ddeddfwriaeth. Bydd y ddau weithiwr yn gallu trafod anghenion cymorth y plentyn / plant gyda chi ac unrhyw gymorth y gallai fod ei angen arnoch i'ch helpu chi a'r plentyn / plant.

Diwygiwyd Diwethaf: 01/05/2026 Nôl i’r Brig