Wedi ei bostio ar Dydd Mawrth 21 Hydref 2025
Image courtesy of Cardiff City FC
Mae dyn ifanc yn ei arddegau o Gwmbrân wedi creu hanes fel y chwaraewr ieuengaf erioed i chwarae dros Glwb Pêl-droed Dinas Caerdydd.
Camodd Robert Tankiewicz i’r cae i'r Adar Gleision yn eu gêm cwpan EFL yn erbyn Casnewydd yn gynharach y mis hwn - ychydig fisoedd ar ôl casglu ei ganlyniadau TGAU yn Ysgol Uwchradd Gatholig Sant Alban.
Torrodd ymddangosiad cyntaf Robert yn 16 mlwydd a 117 diwrnod oed y record flaenorol gan gyn-chwaraewr Caerdydd, Aaron Ramsey o saith diwrnod.
Mae Robert eisoes yn dalent amlwg, ac mae wedi cynrychioli Cymru ar lefel dan 16 ac mae bellach yn falch o wisgo crys rhif 55 i Ddinas Caerdydd.
Dywedodd Robert: "Mae'n gwireddu breuddwyd i fi i chwarae i Gaerdydd. Rydw i wedi gweithio'n galed iawn i gyrraedd fan hyn, ac rwy'n ddiolchgar i bawb sydd wedi fy nghefnogi - fy nheulu, fy hyfforddwyr, ac athrawon. Rwy'n 9llawn cyffro am yr hyn sydd o'n blaenau."
Ymunodd ag academi Caerdydd ar lefel dan-9 ac ers hynny mae wedi bod yn gapten ar Gymru ar lefel oedran, gan ennill lle yn y garfan dan 17 oed. Mae ei dras Bwylaidd yn golygu ei fod yn dal i fod yn gymwys i gynrychioli Gwlad Pwyl yn rhyngwladol.
Ochr yn ochr â'i orchestion chwaraeon, gwnaeth Robert yn dda yn academaidd, gan ennill gradd B mewn Addysg Gorfforol ac, yn drawiadol, B yn y Gymraeg, er iddo symud i Gymru o Wlad Pwyl yn ifanc.
Ychwanegodd Robert, sydd bellach yn cefnogi ymgyrch presenoldeb ysgol Ddim Mewn Colli Mas y cyngor:
"Mae dod i mewn bob dydd, i’r ysgol neu i ymarfer, wedi siapio sut rwy'n mynd ati i daclo pethau. Mae cael cofnod presenoldeb cryf wedi fy helpu i gadw i ganolbwyntio ac yn ddisgybledig - ac mae hynny'n rhywbeth rydw i wedi'i gario i mewn i bêl-droed. Mae'n rhaid i chi fod yn ymroddedig os ydych chi am lwyddo."
Dywedodd Stephen Lord, Pennaeth Ysgol Uwchradd Gatholig Sant Alban:
"Allwn i ddim bod yn fwy balch o Robert a'r cyfan y mae wedi'i gyflawni. Mae bod y chwaraewr ieuengaf erioed i gynrychioli Dinas Caerdydd yn garreg filltir anhygoel, ac yn dyst i dalent, penderfyniad a chymeriad Rob.
"Mae e bob amser wedi dangos aeddfedrwydd sylweddol ar y cae ac oddi arno. Mae ei ymrwymiad i'w ddatblygiad, ei ostyngeiddrwydd, a'i agwedd ddi-ofn at heriau wedi ei wneud yn fodel rôl yn yr ysgol.
"Yn Ysgol Sant Alban, rydym yn ymdrechu i feithrin nid yn unig rhagoriaeth academaidd, ond hefyd twf personol wedi'i wreiddio mewn ffydd a gwerthoedd. Mae Rob yn ymgorffori'r ysbryd hwnnw, a byddwn yn parhau i'w gefnogi ym mhob ffordd y gallwn ac rydym yn edrych ymlaen at weld ei daith yn datblygu."