Wedi ei bostio ar Dydd Gwener 10 Hydref 2025
Heddiw, cynhaliodd Ysgol Uwchradd Cwmbrân dathliad arbennig yn yr ysgol i nodi ei phen-blwydd yn 10 oed.
Ymunodd Arweinydd y Cyngor, y Cynghorydd Anthony Hunt, Ysgrifennydd y Cabinet dros Addysg Lynne Neagle, yr AS Nick Thomas-Symonds, a chyn-ddisgyblion â staff, disgyblion ac aelodau o gymuned ehangach yr ysgol i ddathlu taith, llwyddiannau a dyheadau'r ysgol ar gyfer y dyfodol.
Dywedodd y Pennaeth Matthew Sims: "Mae'n bwysig cydnabod a dathlu ymroddiad a gwaith caled y ffrindiau a'r cydweithwyr niferus sydd wedi cefnogi ein hysgol dros y deng mlynedd diwethaf.
"Wrth edrych ymlaen, rydym yn gwneud hynny gyda hyder ac optimistiaeth, yn falch o rannu cynnydd yr ysgol ac yn benderfynol o sicrhau bod pob un o'n plant yn cael y cyfle i wireddu eu breuddwydion."
Roedd y dathliadau yn cynnwys cyflwyniad gan Arweinwyr Disgyblion, amrywiaeth o berfformiadau cerddorol, a cherddi a adroddwyd gan ofalwyr ifanc yn yr ysgol.
Dywedodd disgybl Blwyddyn 10, Jack: "Rydw i’n mwynhau dod I Ysgol Uwchradd Cwmbrân, rwy’n teimlo fy mod i’n cael fy nghefnogi yma a bod yr ysgol yn fy neall. Dydw i ddim yn hoffi siarad o flaen eraill fel arfer, ond roeddwn i eisiau gwneud hynny heddiw i gynrychioli gofalwyr ifanc."
Ffurfiwyd Ysgol Uwchradd Cwmbrân yn 2015 yn dilyn uno Ysgol Llantarnam ac Ysgol Uwchradd Fairwater, fel rhan o raglen Ysgolion yr 21ain Ganrif Cyngor Torfaen.
Dros y degawd diwethaf mae'r ysgol wedi ennill nifer o wobrau, yn fwyaf arbennig Gwobr Calon y Gymuned a Gwobr Arfer Gorau Gofalwyr Ifanc am adnabod, cefnogi a grymuso gofalwyr ifanc yn yr ysgol.
Yn academaidd, mae llawer o ddisgyblion wedi symud ymlaen i rai o’r prifysgolion gorau, gan astudio pynciau fel meteoroleg, cemeg, deintyddiaeth, meddygaeth a gwyddoniaeth.
Mae'r ysgol hefyd wedi mwynhau llwyddiant chwaraeon, gyda dau ddisgybl Blwyddyn 9 yn ennill capiau criced Cymru, un arall yn sicrhau ail safle yn Rownd Derfynol Naid Uchel Cymru, a thîm Blwyddyn 8 yn cyrraedd Rownd Derfynol Cwpan Cymru.
Dywedodd y Cyng. Richard Clark, Aelod Gweithredol dros Blant, Teuluoedd ac Addysg: "Dylai staff, disgyblion a theuluoedd Ysgol Uwchradd Cwmbrân fod yn falch iawn o'u hysgol. Mae lefelau presenoldeb a chanlyniadau arholiadau yn dangos yr ymrwymiad maen nhw'n ei ddangos i addysg a'u cymuned ysgol."
Fis Hydref diwethaf, agorodd Ysgol Uwchradd Cwmbrân gyfleuster newydd gwerth £500,000 i gefnogi hyd at 40 o ddisgyblion ag anhwylder y sbectrwm awtistiaeth (ASA), ochr yn ochr â gwelliannau i Uned Fyddar yr ysgol.
Dywedodd Kathryn Ayling, Arweinydd Ymgysylltiad Teuluol a Chymunedol: "Mae ysgol yn ymwneud â chymaint mwy nag addysg; mae'n ymwneud â deall a chefnogi'r bywydau ein pobl ifanc y tu hwnt i'r ystafell ddosbarth. Rydym yn hynod falch ac yn angerddol iawn am ddarparu gofal, tosturi a chyfleoedd sy'n helpu pob myfyriwr i deimlo eu bod yn cael eu gweld, eu gwerthfawrogi a'u cefnogi."
Yn gynharach eleni, cafodd yr ysgol - a oedd wedi bod o dan adolygiad gan Estyn ers 2018 - ei dynnu o'r categori mesurau arbennig.
Mae gwaith hefyd ar y gweill ar gae 3G newydd gwerth £1.2m ac ardal hoci wedi'i gwella, a ariennir gan Gronfa Ffyniant Gyffredin y DU, a fydd ar gael i ddisgyblion a chlybiau lleol o'r flwyddyn nesaf ymlaen.