Wedi ei bostio ar Dydd Mercher 6 Awst 2025
Yr wythnos nesaf, bydd Cyngor Torfaen yn nodi 80 mlynedd ers y Fuddugoliaeth dros Japan (Diwrnod VJ) gyda gwasanaeth dinesig arbennig ym Mlaenafon.
Cyhoeddwyd digwyddiad dinesig Diwrnod VJ 80 yn ffurfiol yng nghyfarfod diweddaraf y cyngor llawn gan Arweinydd y Cyngor, y Cyng. Anthony Hunt, a bydd yn coffáu 80 mlynedd ers diwedd yr Ail Ryfel Byd yn ardal y Môr Tawel.
Bydd yn cael ei gynnal am 7pm ddydd Gwener 15 Awst, yn Eglwys Sant Pedr, Blaenafon, ac mae'n dilyn llwyddiant coffáu VE Day 80 a gynhaliwyd yn gynharach eleni yn Eglwys Sant Gabriel, yng Nghwmbrân.
Mae'r Cyngor yn gweithio gyda'r eglwys a grwpiau lleol i gyflwyno gwasanaeth traddodiadol, dan arweiniad y Parchedig Ddoctor Chris Walters. Bydd yn cynnwys gorymdaith araf o faneri ac offeiriad, gyda cherddoriaeth orymdeithiol gan Matthew Bartlett, The Welsh Wedding Bagpiper.
Bydd y gwasanaeth hefyd yn cynnwys darlleniadau gan Phillip Alderman, Dirprwy Arglwydd Raglaw Gwent EF, a'r Gwir Anrhydeddus Nick Thomas-Symonds AS, ymhlith eraill.
Bydd adloniant cerddorol gan y triawd o dde Cymru, The Toodle Pips, a fydd yn perfformio clasuron o adeg y rhyfel fel We'll Meet Again a Mr Sandman.
Bydd y gwasanaeth yn cynnig cyfle ystyrlon i bobl fyfyrio ar yr aberth a wnaed gan y genhedlaeth ryfeddol a sicrhaodd heddwch a rhyddid i genedlaethau'r dyfodol.
Dywedodd y Cyng. Anthony Hunt, Arweinydd Cyngor Torfaen: "Mae Diwrnod VJ yn nodi pennod olaf yr Ail Ryfel Byd a dechrau heddwch ar ôl blynyddoedd o wrthdaro byd-eang.
"Wrth i ni ymgynnull i fyfyrio 80 mlynedd yn ddiweddarach, rydym yn anrhydeddu dewrder, gwytnwch ac aberth y rhai a wasanaethodd yn y Môr Tawel. Heddwch yw eu rhodd i ni, ac mae'n ddyletswydd arnom i gofio a chynnal y gwerthoedd y gwnaethon nhw ymladd drostynt.
"Mae croeso i bawb ymuno â'r gwasanaeth ym Mlaenafon i dalu teyrnged i'r genhedlaeth ryfeddol hon."
Am fwy o wybodaeth am y digwyddiad, cysylltwch â Chris Slade drwy ffonio 01495 762200 neu e-bostio chris.slade@torfaen.gov.uk