Wedi ei bostio ar Dydd Iau 26 Hydref 2023
Mae Cyngor Torfaen wedi bod yn gweithio gyda Thai Cymunedol Bron Afon er mwyn cynyddu nifer y fflatiau sydd â chyfleusterau ailgylchu.
Yr wythnos hon, ychwanegwyd 18 fflat ar Albion Road at gynllun ailgylchu wrth ymyl y ffordd wythnosol y Cyngor.
Meddai Anthea Roger, 57, sy’n byw mewn fflat ar Albion Road: “Rwy’n hapus iawn fy mod i nawr yn gallu ailgylchu bob wythnos. Roeddwn i’n ailgylchu yn y fflatiau lle’r oeddwn i’n byw ddiwethaf, felly rydw i wedi gweld eisiau hynny yn y fan yma.
“Mae’n ddigon hawdd ailgylchu, ac mae’n lleihau’r sbwriel sy’n mynd i’ch bin â chlawr porffor.
“Byddaf yn sicr yn annog ein trigolion eraill yn yr adeilad i ailgylchu nawr.”
Meddai’r Cynghorydd Mandy Owen, Aelod Gweithredol dros yr Amgylchedd: “Mae gan bob set o fflatiau ei heriau ei hun, ac felly rydyn ni wrth ein boddau fod Bron Afon wedi gallu cael 18 arall o’i fflatiau i ddefnyddio’n cynllun casglu bwyd gwastraff i’w ailgylchu. Bydd y tîm gwastraff yn parhau i weithio gyda Bron Afon dros yr ychydig flynyddoedd nesaf er mwyn cael mwy o fflatiau i ailgylchu.
“Mae pawb yn gweithio’n galed i godi’r gyfradd ailgylchu yn Nhorfaen, ac rydyn ni wrth ein boddau fod mwy o drigolion nawr yn gallu defnyddio’r cynllun ailgylchu wrth ymyl y ffordd.”
Meddai Dusi Thomas, Rheolwr Cynaliadwyedd ac Amgylcheddol gyda Bron Afon, “Rydyn ni’n falch o gefnogi pobl sydd eisiau gwella’r cymunedau lle maen nhw’n byw ac yn barod i wneud beth bynnag y gallwn ei wneud i annog pobl i ailgylchu. Rydyn ni’n dymuno parhau i weithio gyda’r cyngor er mwyn helpu Torfaen i gynyddu ei gyfradd ailgylchu a lleihau’r gwastraff sy’n mynd i safle tirlenwi. Mae hyn yn rhywbeth y gall bob un ei wneud yn hawdd, ac mae’n gymorth i leihau allyriadau carbon ac yn arbed arian.
“Rydyn ni’n falch o allu darparu datrysiad ymarferol ar gyfer ein cwsmeriaid yn Albion Road a byddwn yn mynd â’r hyn a ddysgwyd at gymunedau eraill fel cymorth i roi mynediad hwylus at gyfleusterau ailgylchu i fwy o’n cwsmeriaid.
Mae cynyddu nifer y fflatiau sydd â chyfleusterau i ailgylchu wrth ymyl y ffordd yn rhan o ymgyrch Codi’r Gyfradd y Cyngor er mwyn cynyddu cyfraddau ailgylchu gwastraff y cartref i 70 y cant erbyn 2025.
Rhagor o wybodaeth am ailgylchu yn Nhorfaen fel cymorth i Godi’r Gyfradd