Wedi ei bostio ar Dydd Gwener 24 Mawrth 2023
Cyngor Torfaen yw’r cyngor diweddaraf yng Nghymru i lofnodi Siarter Creu Lleoedd Cymru. Mae’r cam hwn yn arwydd o gefnogaeth y cyngor i egwyddorion creu lleoedd. Mae’r cyngor yn ymuno â dros 130 o sefydliadau sydd wedi llofnodi’r Siarter, gan gynnwys pum awdurdod lleol arall yng Nghymru.
Datblygwyd Siarter Creu Lleoedd Cymru gan Lywodraeth Cymru a Chomisiwn Dylunio Cymru er mwyn cyflwyno egwyddorion Creu Lleoedd mewn dogfen y gall bob sefydliad a chorff sy’n rhan o’r broses ddatblygu ei llofnodi a’i hardystio.
Fel un o lofnodwyr y Siarter, mae’r cyngor yn addo:
- sicrhau bod y gymuned leol yn cael cyfrannu at ddatblygu cynigion
- dewis mannau cynaliadwy ar gyfer datblygiadau newydd
- rhoi blaenoriaeth i gerdded, beicio a thrafnidiaeth gyhoeddus
- creu strydoedd a mannau cyhoeddus penodedig, diogel a chroesawgar
- hyrwyddo cymysgedd cynaliadwy o ddefnyddiau i wneud lleoedd byrlymus, a
- thrysori a pharchu rhinweddau a hunaniaeth unigryw a chadarnhaol lleoedd.
Meddai’r Cynghorydd Joanne Gauden, Aelod Gweithredol Torfaen dros Yr Economi, Sgiliau ac Adfywio: ‘Mae’r cyngor wedi llofnodi Siarter Creu Lleoedd Cymru fel arwydd pellach o’r modd y mae’r egwyddorion yn cyd-fynd ag uchelgeisiau ein Cynllun Sirol newydd a’n hamcanion llesiant.
‘Mae creu lleoedd yn ffordd holistaidd o gynllunio a dylunio, ac mae’r ffocws ar hyrwyddo ffyniant pobl, eu hiechyd, eu hapusrwydd a’u llesiant, yn yr ystyr ehangaf. Dylai pob datblygiad newydd gofleidio cymeriad cymunedau Torfaen a’u nodweddion unigol, a cheisio creu lleoedd sy’n creu ymdeimlad o gymuned a lle y gall bobl fodloni eu hanghenion bob-dydd.’
Meddai Cyfarwyddwr Strategol yr Economi a’r Amgylchedd Torfaen, Rachel Jowitt: ‘Mae creu lleoedd yn gysyniad eang sy’n pwysleisio nodweddion arbennig ein cymunedau a’u hunaniaeth unigryw. Nid yw’r ffordd hon o weithio yn newydd yn Nhorfaen oherwydd mae egwyddorion y Siarter hwn yn amlwg yn ein cynlluniau lle ar gyfer Pont-y-pŵl a Blaenafon. Fodd bynnag, mae’r cam hwn o lofnodi’r Siarter yn cryfhau ein hymrwymiad i’r egwyddorion ac yn gymorth i gyfoethogi Torfaen fel lle blaengar a chynhwysol i fyw ac i weithio sy’n edrych tua’r dyfodol.’
I gael rhagor o wybodaeth am y Siarter, rhowch glic ar Siarter Creu Lleoedd (Placemaking Charter) - Comisiwn Dylunio Cymru (dcfw.org)