Cynllunio digwyddiadau ac ystyriaethau gwrthderfysgaeth

Mae Cyngor Bwrdeistref Sirol Torfaen, Heddlu Gwent ac Uned Plismona Gwrthderfysgaeth Cymru yn gweithio gyda'i gilydd i roi cyngor a chefnogaeth i drefnwyr digwyddiadau ynghylch sut i liniaru'r bygythiad o derfysgaeth wrth gynllunio digwyddiad yn ardal Bwrdeistref Sirol Torfaen. Er bod digwyddiadau yn ddiogel yn gyffredinol, mae'r bygythiad o derfysgaeth yn real ac yn anffodus yn fwyfwy anrhagweladwy, gyda mannau cyhoeddus ac ardaloedd lle mae yna dorf yn darged deniadol i derfysgwyr.

I gael gwybod beth yw lefel y bygythiad ar hyn o bryd yn y DU, ewch i: Current UK Threat Level

Hoffem i chi ystyried yr hyn y gallwch chi ei wneud i leihau eich risg ac i liniaru yn erbyn effaith ymosodiad o'r fath. Mae cynllunio effeithiol yn gallu lleihau'r tebygolrwydd o ymosodiad yn fawr.  Gwerthfawrogwn nad yw pob digwyddiad yr un peth, er enghraifft:

• Dylai digwyddiadau llai ystyried ychwanegu ystyriaethau Gwrthderfysgaeth at eu Cynllun Rheoli/Asesiad Risg ar gyfer Digwyddiadau.  Gallai gael sylw wrth friffio stiwardiaid ac anogir pob aelod o staff i gwblhau'r sesiynau hyfforddi ar-lein byr canlynol:
• Hyfforddiant Gwrthderfysgaeth ACT - hyfforddiant am ddim a ddarperir gan y Swyddfa Diogelwch Gwrthderfysgaeth Genedlaethol.
• Hyfforddiant SCaN - hyfforddiant am ddim am SCAN (SEE CHECK and NOTIFY) a ddarperir gan Highfield Learning.
• Dylai digwyddiadau mwy o faint fel digwyddiadau cerddoriaeth / gwyliau / gwyliau bwyd / Stadia Chwaraeon ayb., lenwi Cynllun Diogelwch Digwyddiadau manwl a dilysu'r cynllun gydag ymarferion rheolaidd.

Efallai y byddwch chi'n gyfarwydd â llunio cynllun ar gyfer eich digwyddiad a byddwch yn gwybod sut i fynd i'r afael â llawer o'r gofynion ynghylch diogelwch, ond efallai na fyddwch chi mor gyfarwydd â materion diogelwch a therfysgaeth yn benodol. Dyma rai o'r pethau yr hoffem i chi eu hystyried wrth roi eich cynllun at ei gilydd. Dydy hon ddim yn rhestr gynhwysfawr ac ar ddiwedd y ddogfen hon rydyn ni’n dangos y ffordd i chi at wefannau lle gallwch gael rhagor o wybodaeth.

Cynllunio Diogelwch

Gan ddibynnu ar y math o ddigwyddiad sydd gennych, a’i faint, efallai y bydd angen i chi lunio cynllun diogelwch ar gyfer eich digwyddiad sy'n ystyried risg/bygythiad o ymosodiad terfysgol. Os nad ydych yn siŵr, gall eich rheoleiddwyr lleol fel Heddlu Gwent, yr Awdurdod Lleol neu Grŵp Cynghori ar Ddiogelwch Digwyddiadau Torfaen, eich cynghori am y camau priodol a chymesur y dylech eu cymryd wrth gynllunio eich digwyddiad. Gallech gynnwys y materion canlynol:

• Cyn y digwyddiad, sut fyddwch chi'n ei hysbysebu - byddwch yn ofalus i beidio â rhoi gormod o wybodaeth a allai helpu terfysgwr i gynllunio ymosodiad. Ystyriwch beth allech chi ei gynnwys i atal hyn. Rydyn ni'n galw hyn yn gyfathrebu i atal.
• Eich safle, gan ddechrau o'r ffordd at y digwyddiad a’r perimedr i'r tu mewn lle mae'r digwyddiad yn digwydd. Beth yw'r risgiau a beth allwch chi ei wneud i liniaru yn eu herbyn?
• Mae cyfathrebu yn allweddol wrth reoli digwyddiadau. Ydy’ch cyfathrebu chi’n 'addas at y diben’? Dydy hyn ddim yn golygu sut rydych chi'n cyfathrebu â'ch staff yn unig, ond hefyd y cyhoedd.
• Os ydych chi'n trefnu digwyddiad ac mae llawer o bobl yn rhan o’r digwyddiad neu’n dod i’r digwyddiad, ystyriwch gynnal senarios ymarfer diogelwch neu wrthderfysgaeth pen-desg sy'n cynnwys y tîm cyfan o bobl sy’n rheoli’r digwyddiad.
• Hyfforddiant ar gyfer staff cyflogedig a gwirfoddolwyr. Mae yna hyfforddiant Ymwybyddiaeth ACT e-Ddysgu ar-lein ardderchog i godi ymwybyddiaeth ac i rymuso'ch staff. I gofrestru ar gyfer yr hyfforddiant ar-lein gweler y ddolen ar ddiwedd y dudalen hon.

Mae Grŵp Cynghori ar Ddiogelwch Digwyddiadau Torfaen yn argymell yn gryf eich bod yn cynllunio ar gyfer digwyddiad terfysgol ac efallai y bydd yn gofyn i chi am fanylion eich Cynllun Diogelwch Digwyddiadau wrth ystyried eich cais.

Mae'r dolenni isod yn rhoi rhagor o wybodaeth i’ch helpu i liniaru ymosodiadau terfysgol ac i'ch helpu i ddatblygu eich Cynllun Diogelwch Digwyddiadau.

www.protectuk.police.uk - gweler y canllawiau ‘Venues and Public Spaces guidance’ i oleuo’ch Cynllun Diogelwch Digwyddiadau a’ch helpu i’w ddatblygu. Mae'r wefan hon hefyd yn cynnwys canllawiau cenedlaethol eraill a manylion am gynhyrchion pwysig sy'n rhad ac am ddim.

National Protective Security Authority  – Cyngor pellach am fesurau diogelwch amddiffynnol.

Hyfforddiant Gwrthderfysgaeth ACT – e-ddysgu gan y Swyddfa Diogelwch Gwrthderfysgaeth Genedlaethol (am ddim).

Mae'r cwrs rhyngweithiol, sydd ar gael i gwmnïau neu unigolion preifat, yn cymryd dim ond 45 munud i'w gwblhau a gellir ei wneud i gyd ar yr un pryd neu mewn modiwlau byr. Mae'n esbonio sut i sylwi ar arwyddion o ymddygiad amheus a beth i'w wneud i’ch  helpu chi ac eraill, a'r ymatebwyr brys, os oes ymosodiad.

Cadw pawb yn ddiogel mewn digwyddiadau – cyngor eang gan Protect UK, am gadw pawb yn ddiogel mewn digwyddiadau.

The Purple Guide - - dylid ymgynghori â ‘Purple Guide’ (gwasanaeth rydyn ni’n talu amdano) wrth gynllunio digwyddiadau ac mae wedi'i gynllunio i roi arweiniad i drefnwyr digwyddiadau, cyflenwyr, awdurdodau lleol, ac unrhyw un arall sy'n gysylltiedig â'r diwydiant digwyddiadau awyr agored.