Mae Rheoliadau Lles Anifeiliaid (Bridio Cŵn) (Cymru) 2014 yn ei gwneud yn ofynnol bod angen trwydded ar unrhyw un sy'n bridio tri neu fwy o dorllwythi o gŵn bach mewn cyfnod o 12 mis. Mae'n ofynnol bod trwydded gan unrhyw un sy'n bridio cŵn at ddibenion masnachol, p'un a ydynt mewn adeilad masnachol neu ddomestig.
Mae hyn yn golygu bod RHAID i unrhyw un sy'n bridio cŵn er budd masnachol gael trwydded gan yr awdurdod lleol cyn iddynt gychwyn ar eu busnes.
Mae person a geir yn euog o drosedd o dan y rheoliad hwn yn atebol, dan euogfarn ddiannod, i gyfnod mewn carchar am dymor nad yw'n hwy na chwe mis, dirwy nad yw'n fwy na £5000, neu'r ddau.
Mae trwyddedau'n ddilys am gyfnod o 12 mis a rhaid eu hadnewyddu cyn eu dyddiad dod i ben.
Cyn rhoi trwydded i ymgeisydd rhaid iddo allu dangos
- Y bydd y cŵn bob amser yn cael eu cadw mewn llety sy'n addas o ran gwneuthuriad, maint, nifer yr anifeiliaid a gedwir yno, cyfleusterau ymarfer, tymheredd, golau, awyr iach a glendid.
- Y bydd y cŵn yn cael cyflenwad digonol o fwyd, diod a deunydd gwely addas, yn cael eu hymarfer yn ddigonol, ac yr ymwelir â nhw'n ddigon mynych (i'r graddau y bo angen hynny).
- Y cymerir pob rhagofal rhesymol i atal a rheoli lledaeniad clefydau heintus neu glefydau cyffwrdd-ymledol ymhlith y cŵn, gan gynnwys darparu cyfleusterau cadw ar wahân.
- Y bydd camau priodol yn cael eu cymryd i ddiogelu'r cŵn os digwydd tân neu argyfwng arall, gan gynnwys darparu offer addas a digonol i ymladd tân.
- Y bydd yr holl gamau priodol yn cael eu cymryd i sicrhau y bydd bwyd, diod a deunydd gwely addas yn cael eu darparu i'r cŵn, a'u bod yn cael digon o ymarfer, wrth eu cludo i'r sefydliad bridio neu oddi yno.
Mae ychydig o bwyntiau perthnasol eraill i'w nodi ynglŷn â'r drwydded:
- Ni chaniateir bridio geist tan eu bod yn 12 mis oed o leiaf.
- Ni chaniateir i unrhyw ast gael mwy na 6 thorllwyth yn ystod ei hoes.
- Ni chaniateir i unrhyw ast eni cŵn bach o fewn 12 mis o gael torllwyth flaenorol.
- Yn achos pob trwydded gyntaf, bydd y safle yn cael arolygiad gennym ni a milfeddyg.
- Gallwn gynnal arolygiadau dilynol ar ein pen ein hunain, ond gallwn alw milfeddyg os ydym o'r farn bod angen gwneud hynny.
- Ni chaiff bridiwr trwyddedig werthu ci i aelod o'r cyhoedd os yw o'r farn y bydd yr unigolyn hwnnw'n gwerthu'r ci ymlaen i rywun arall.
- Ni cheir gwerthu cŵn os ydynt o dan 8 wythnos oed heblaw i siop anifeiliaid anwes drwyddedig.
Dylid brechu pob ci er mwyn atal a rheoli lledaeniad clefydau heintus a chlefydau cyffwrdd-ymledol. Yn ymarferol, mae hyn yn golygu y dylid brechu pob ci yn erbyn:
- Clefyd y Cŵn;
- Hepatitis Heintus mewn Cŵn;
- Leptosbirosis; a
- Pharfofeirws cŵn.
Mae'r gyfraith yn golygu nad yw pob bridiwr cŵn wedi'i drwyddedu – yn benodol, gall rhai pobl sy'n arbenigo mewn bridio cŵn o dras gael eu heithrio o'r gyfraith. Yn anffodus, rydym yn gwybod bod rhai bridwyr yn defnyddio'r bwlch hwn yn y gyfraith i redeg busnesau bridio cŵn sy'n herio'r gyfraith ar les anifeiliaid, ac mae bron yn amhosibl i ni ddarganfod y rhain a chymryd camau yn eu herbyn ar hyn o bryd.
Os byddwch chi'n prynu ci bach, mae'n bwysig iawn gwneud yn siŵr eich bod yn defnyddio safle cyfreithlon a dylech BOB AMSER ymweld â'r bridiwr yn ei gartref i weld sut cafodd y ci bach ei fridio a'i fagu.
Peidiwch BYTH â phrynu ci bach oddi wrth rywun mewn ffair neu wrth ochr y ffordd – y tebyg yw i'r ci bach gael ei fridio'n anghyfreithlon heb fawr ddim sylw i les anifeiliaid. Mae llawer o bobl sy'n prynu cŵn bach yn y modd hwn yn wynebu biliau milfeddyg sy'n gallu dod i filoedd o bunnoedd.
Gallwch gysylltu â ni i gael manylion safleoedd trwyddedig a phobl eraill sy'n bridio cŵn yn gyfreithlon yn ardal Torfaen.
Mae trwyddedau Bridio Cŵn yn helpu i sicrhau bod cŵn yn cael gofal priodol, trwy osod safonau ar gyfer safleoedd a lefel y gofal a roddir. Yn benodol, mae'n sicrhau bod geist sy'n bridio yn cael eu trin yn briodol, a bod y cŵn bach yn cael gofal da. Rydym yn arolygu'r safleoedd hyn yn rheolaidd o ran diogelwch, a daw milfeddyg gyda ni i sicrhau eu bod yn cyflawni safonau lles anifeiliaid.
Ar hyn o bryd, dim ond bridio cŵn sy'n cael sylw penodol yn y gyfraith ar drwyddedu.
Os oes gennych unrhyw ymholiadau neu bryderon ynghylch safle trwyddedig, neu'n pryderu y gallai safle fod yn bridio cŵn heb drwydded, cysylltwch â ni fel y gallwn ymchwilio a gweithredu fel bo'r angen. Gallwn archwilio safonau gofal ar gyfer anifeiliaid anwes heblaw am gŵn hefyd, gan ddefnyddio ein pwerau o dan y Ddeddf Lles Anifeiliaid.
Gwneud Cais am Drwydded
Crynodeb o'r Drwydded
Os ydych yn dymuno bridio cŵn er mwyn gwneud elw masnachol, bydd angen i chi gael trwydded bridio cŵn cyn i chi ddechrau eich busnes a chynnal y drwydded honno drwy gydol yr adeg pan fyddwch yn rhedeg eich busnes.
Nodir isod y wybodaeth y mae ei hangen arnoch er mwyn penderfynu a oes angen trwydded arnoch, ynghyd â manylion y safonau trwyddedu y mae'n rhaid i chi eu cyflawni.
Gwybodaeth ac arweiniad ynghylch y gyfraith
Sut i wneud cais
Cysylltwch â ni cyn gwneud cais am drwydded fel y gallwn gynghori am y gofynion a'r amodau y bydd angen i chi eu bodloni.
- Cais am drwydded i gadw sefydliad bridio cŵn (yn agor mewn tab newydd)
- Amodau a chanllawiau i fridwyr cŵn (yn agor mewn tab newydd)
- Amodau a chanllawiau ar gyfer bridio cŵn yn y cartref (yn agor mewn tab newydd)
- Cynllun cyfoethogi amgylchedd bridio cŵn (yn agor mewn tab newydd)
- Bridio cŵn: cynllun cymdeithasoli'r cŵn bach (yn agor mewn tab newydd)
Ffïoedd ymgeisio
Lawrlwythwch gopi o'r ffïoedd ymgeisio.
Y broses ymgeisio
Mae'r broses o wneud cais am drwydded yn gymharol syml. Pan fyddwch wedi llenwi'r ffurflen gais, byddwn yn trefnu ymweld â chi gyda milfeddyg er mwyn asesu safonau eich safle. Os oes unrhyw feysydd y mae angen eu gwella, byddwn yn rhoi'r wybodaeth sydd ei hangen arnoch i gydymffurfio â'r amod trwyddedu.
Pan fydd eich safle wedi'i drwyddedu, byddwn yn cynnal arolygiad blynyddol ar adeg adnewyddu eich trwydded, a gallwn gynnal ymweliadau yn y cyfamser hefyd. Fel rhan o broses y drwydded, bydd angen i chi roi gwybod i ni am unrhyw newidiadau i'ch busnes.
Sylwer, gallai rhai o fanylion eich safle gael eu cynnwys ar ein gwefan fel y gall cwsmeriaid ddewis safle trwyddedig i brynu eu hanifail anwes. Hefyd, gallem rannu eich manylion gyda chyrff statudol eraill fel y bo'n briodol.
A yw Cymeradwyaeth Ddealledig yn berthnasol?
Nid yw cymeradwyaeth ddealledig yn berthnasol i'r drwydded hon oherwydd, er budd y cyhoedd, rhaid i'r awdurdod brosesu eich cais cyn ei gymeradwyo. Os nad ydych wedi clywed gennym o fewn 28 diwrnod, cysylltwch â ni i gael diweddariad ynghylch eich cais.
Sylwer, gallai'r broses gymeradwyo gyfan gymryd mwy na 28 diwrnod, er mwyn caniatáu am y prosesau arolygu angenrheidiol.
Apeliadau a Chwynion
Os gwrthodir eich cais, neu os nad ydych yn derbyn unrhyw rai o'r amodau trwydded a gyflwynir fel rhan o'r gymeradwyaeth, dylech gysylltu â'r swyddog sy'n delio â'ch trwydded yn y lle cyntaf. Byddwn bob amser yn rhoi gwybod i chi am y gweithdrefnau apelio pan fyddwn yn gwrthod trwydded, neu ar gais.
Hefyd, byddwn yn rhoi gwybod i chi am ein gweithdrefn gwyno os ydych o'r farn na chafodd eich cais ei brosesu'n briodol. Mae gwybodaeth bellach am wneud cwyn i'w chael yn y fan hon.
Gall trwyddedau gael eu gwrthod, eu canslo neu eu diddymu am sawl rheswm (sylwer nad yw pob cyfyngiad yn berthnasol i bob trwydded). Gallai'r Llysoedd wahardd ymgeiswyr rhag dal trwydded anifeiliaid am gyfnod penodedig:
- Os yw'r ymgeisydd o dan 18 oed
- Os yw'r ymgeisydd wedi'i wahardd rhag dal trwydded anifeiliaid neu gadw anifail
- Os na chaiff amodau'r drwydded eu bodloni
Cymdeithasau Masnach
Sylwer - mae gan Gyngor Bwrdeistref Sirol Torfaen (y Cyngor) ddyletswydd i warchod yr arian cyhoeddus a weinyddir ganddo ac, i'r perwyl hwnnw, gall ddefnyddio'r wybodaeth rydych chi'n ei rhoi o fewn Cyngor Bwrdeistref Sirol Torfaen i atal a datgelu twyll. Hefyd, gall y Cyngor rannu'r wybodaeth hon â chyrff eraill sy'n gweinyddu neu'n derbyn arian cyhoeddus at y dibenion hyn yn unig. Am ragor o wybodaeth, gweler tudalen y Fenter Twyll Genedlaethol ar y wefan hon.