Wedi ei bostio ar Dydd Iau 10 Awst 2023
Wrth i Lywodraeth Cymru symud ymlaen gyda chynlluniau i ddiddymu elw o’r gyfundrefn plant mewn gofal, mae Maethu Cymru Torfaen yn pwysleisio manteision maethu gydag awdurdod lleol.
Mae Cymru yn y broses o newid cyfan i’r system ar gyfer gwasanaethau plant.
Mae’r newidiadau a gynigiwyd yng nghytundeb cydweithio 2021 rhwng Llywodraeth Cymru a Phlaid Cymru yn rhoi blaenoriaeth i wasanaethau sydd wedi eu lleoli a’u cynllunio’n lleol ac yn atebol yn lleol hefyd.
Yn y cynlluniau yma mae yna ymrwymiad clir i ‘ddileu elw preifat o ofal plant
sy’n derbyn gofal.’ Mae hyn yn golygu, erbyn 2027, bydd gofal plant sy’n derbyn gofal yng Nghymru yn cael ei ddarparu gan y sector gyhoeddus neu sefydliadau elusennol neu nid-er-elw.
Esboniodd un gofalwr maeth, Jo, a newidiodd o asiantaeth annibynnol at Faethu Cymru yn gynharach eleni, ei thaith - a’r gwahaniaeth y mae hi wedi gweld wrth faethu gyda’r awdurdod lleol:
Dywedodd Jo: “Yn fuan ar ôl i mi droi’n ddeugain oed, dechreuais faethu pobl ifanc yn eu harddegau trwy asiantaeth. Roedd llawer o bobl ifanc yn dod o’r tu allan i’r ardal. Roedd hyn yn eu rhoi o dan anfantais. Roedden nhw’n colli cysylltiad â’u ffrindiau, y mannau yr oedden nhw’n gyfarwydd â nhw, a’u gwreiddiau.
“Nawr fy mod yn maethu gydag awdurdod lleol, mae’r bobl ifanc yn aros yn lleol. Mae hyn yn golygu eu bod yn aros wrth eu gwreiddiau sy’n eu helpu i deimlo’n ddiogel ac mae’n fwy naturiol ar gyfer ymweliadau ac amser i’r teulu.”
O ganlyniad i’r newidiadau yma, mae Maethu Cymru Torfaen - sy’n rhan o’r rhwydwaith sy’n cynrychioli 22 awdurdod lleol Cymru - yn galw am fwy o bobl i fod yn ofalwyr maethu gyda’r awdurdod lleol ac yn annog y rheiny sy’n maethu ar hyn o bryd gydag asiantaeth sy’n gweithredu er elw i drosglwyddo at dîm eu hawdurdod lleol.
Yng Nghymru, mae 79% o blant sy’n cael gofal trwy asiantaethau maethu preifat yn cael eu gosod y tu allan i’w hardal leol, ac mae 6% yn cael eu symud o Gymru’n llwyr.
Yn y cyfamser, mae 84% o’r rheiny sy’n byw gyda gofalwyr maeth yr awdurdod lleol yn aros yn eu hardal leol, yn agos at gartref, ysgol teulu a ffrindiau.
Dywedodd Aelod Gweithredol Cyngor Torfaen dros Blant, Teuluoedd ac Addysg, y Cynghorydd Richard Clark: "Mae Cymru’n arwain y ffordd mewn gofal am ein pobl ifanc. Mae’r ffordd yma o weithredu’n rhoi cyfle euraidd i ni sicrhau newid parhaus a chadarnhaol.
“Mae gofalu gyda’r awdurdod lleol yn cynnig cefnogaeth lawn a hyfforddiant, a byddwch yn ymuno â chymuned gofal maeth, gan helpu plant i aros yn nes at gartref. Ffoniwch un o aelodau’n tîm i ofyn unrhyw gwestiynau ac ymunwch â’r cannoedd o deuluoedd sydd eisoes yn llunio dyfodol gwell i bobl ifanc yn Nhorfaen."
Am fwy o wybodaeth am faethu, a sut i fod yn ofalwr maeth gyda’r cyngor, ewch i:
Eisoes yn Maethu? | Maethu Cymru Torfaen