Presenoldeb Ysgol

Fel rhiant, chi sy'n gyfrifol yn ôl y gyfraith, am sicrhau bod eich plentyn yn mynychu'r ysgol.  

Os yw eich plentyn yn methu’r ysgol heb reswm derbyniol, rydych mewn perygl o gael Hysbysiad Cosb Benodedig neu gael eich erlyn. 

Os na all eich plentyn fynychu'r ysgol, rhaid i chi hysbysu'r ysgol i esbonio pam cyn gynted â phosibl.  

Gall ysgol eich plentyn awdurdodi absenoldebau: 

• Os yw eich plentyn yn rhy sâl i fynd i’r ysgol
• Os oes ganddynt apwyntiad deintyddol neu feddygol
• Os yw perthynas wedi marw
• Am resymau ee gŵyl grefyddol

Nid yw'r canlynol yn rhesymau derbyniol dros golli'r ysgol a gellir eu hystyried yn absenoldebau heb awdurdod:

• teithiau dydd
• teithiau siopa
• diwrnodau i ffwrdd i ddathlu pen-blwydd
• ymweld â pherthnasau
• cysgu’n hwyr
• gofalu am frodyr neu chwiorydd

Gwyliau  

Mae'n rhaid i chi gyflwyno cais ffurfiol i'r Pennaeth i fynd â phlant ar wyliau yn ystod y tymor ysgol. Os gwrthodir y cais, bydd yn cael ei ystyried yn absenoldeb heb awdurdod, a gallech dderbyn Hysbysiad Cosb Benodedig.   

Mae 190 o ddiwrnodau ysgol mewn blwyddyn, sy’n gadael 175 o ddiwrnodau ar benwythnosau a gwyliau ysgol. Gallwch weld dyddiadau gwyliau ysgol yma: Dyddiadau Tymhorau Ysgol a Gwyliau.

#DdimMewnColliMas 

Mae gwasanaeth addysg Cyngor Torfaen wedi lansio ymgyrch i ddathlu’r gwahanol fanteision a geir wrth fynd i’r ysgol bob dydd.  Chwiliwch yr hashnod ar y cyfryngau cymdeithasol i weld beth sy’n digwydd yn eich ysgol leol.

Roedd disgyblion a staff Ysgol Gynradd Llanyrafon ac Ysgol Abersychan ymhlith y cyntaf i gael eu cynnwys mewn cyfres o fideos cyfryngau cymdeithasol yn hyrwyddo rhai o'r rhesymau pam mae eu disgyblion - a'u staff - wrth eu bodd yn mynd i'r ysgol.

Ydych chi'n cael trafferth anfon eich plentyn i'r ysgol?

Os nad yw eich plentyn eisiau mynd i'r ysgol, gallwch siarad ag athro/athrawes dosbarth eich plentyn, Pennaeth Blwyddyn neu’r Pennaeth i gael cymorth a chefnogaeth. Mae cyngor a chefnogaeth ar gael hefyd gan Swyddog Lles Addysg yr ysgol. 

Clefydau ac anhwylderau cyffredin

Os yw eich plentyn yn rhy sâl i fynd i'r ysgol, cysylltwch â'r ysgol cyn gynted â phosibl fel y gellir ei gofnodi fel absenoldeb awdurdodedig.

Os na fyddwch yn rhoi gwybod i'r ysgol, neu os na all yr ysgol gael gafael arnoch, gallant gofnodi’r absenoldeb fel absenoldeb heb awdurdod, a allai arwain at Hysbysiad Cosb Benodedig.

Os nad yw eich plentyn yn sâl ond nad ydych yn siŵr a all fynd i'r ysgol, ewch i wefan ABB  i gael mwy o wybodaeth am glefydau ac anhwylderau cyffredin mewn plentyndod a p’un ai bod angen amser i ffwrdd arnynt.

Bob hydref, gall disgyblion cynradd ac uwchradd gael y brechlyn ffliw yn yr ysgol. Bydd angen i chi lenwi ffurflen ganiatâd pan fydd eich ysgol yn ei hanfon allan. Gall symptomau'r ffliw fod yn ysgafn ond gall arwain at gyflyrau mwy difrifol fel niwmonia a broncitis.