Wedi ei bostio ar Dydd Gwener 23 Mehefin 2023
Mae tua thraean o’r holl fwyd sy’n cael ei gynhyrchu ar gyfer pobl yn cyfrannu tua 8 y cant o allyriadau nwyon tŷ gwydr y byd.
Nod tîm Arlwyo Ysgolion Cyngor Torfaen yw lleihau rhywfaint ohonynt, o leiaf, trwy drawsnewid y ffordd y mae prydau ysgol yn cael eu cynllunio a’u creu a ffynhonnell y cynhwysion ar eu cyfer.
Mae’r tîm wedi datblygu Map Siwrnai Cynaliadwyedd newydd sy’n cyflwyno’i cynlluniau ar gyfer y ddwy flynedd nesaf, a bydd yn adrodd yn rheolaidd ar gynnydd er mwyn i ysgolion a disgyblion allu cadw llygad ar y cynnydd. Un fenter sydd wedi bod ar waith yw cystadleuaeth Gwroniaid Gwastraff, i ddisgyblion ysgolion cynradd. Mae’r fenter yn annog disgyblion i fonitro gwastraff bwyd amser cinio, a’i leihau. Rhagor o wybodaeth am y gystadleuaeth.
Erbyn hyn, mae’r gwaith y mae’r gwasanaeth wedi ei wneud i ddatblygu’r map wedi cyrraedd y rhestr fer ar gyfer gwobr genedlaethol gan LACA, sef y corff proffesiynol arweiniol ar gyfer y sector prydau ysgol.
Mae enwebiadau’r wobr ar gyfer unigolion neu dîmau sy’n sefyll allan am gyflawni rhywbeth gwahanol, arddangos syniadau arloesol, cydweithio a gweithio mewn partneriaeth ac sydd wedi cwrdd ag amcanion busnes ac wedi sicrhau bod y gwasanaeth arlwyo ysgolion yn fwy gweladwy.
Bydd y rownd derfynol ddydd Iau 6 Gorffennaf yng Ngwesty’r Hilton Metropole, Birmingham.
Meddai’r Cynghorydd Mandy Owen, Aelod Gweithredol dros yr Amgylchedd: “Mae’r Tîm Arlwyo Ysgolion yn uchelgeisiol iawn ynghylch materion fel lleihau gwastraff bwyd, a lleihau allyriadau carbon. Dymunaf y gorau iddynt ar noson y gwobrau – maen nhw’n haeddu’r gydnabyddiaeth.
“Maen nhw’n gweithio’n galed iawn gydag ysgolion a phartneriaid eraill i sicrhau bod prydau ysgol yn flasus, yn llawn maeth ac yn gynaliadwy.”
Mae’r prosiect hwn yn cyfrannu at amcanion llesiant y cyngor i ymateb i’r argyfyngau hinsawdd a natur. Gallwch ddarllen mwy am Gynllun Sirol y cyngor yma.
Y llynedd, lansiodd y cyngor wasanaeth ailgylchu gwastraff bwyd newydd i ysgolion cynradd ac uwchradd sy’n defnyddio Gwasanaeth Arlwyo Torfaen. Un ymdrech o blith nifer wrth i’r cyngor geisio #Codi’rGyfradd ac ailgylchu mwy yn unol â tharged Llywodraeth Cymru i ailgylchu 70% erbyn 2025.
Rhagor o wybodaeth am Arlwyo ysgolion cynradd.