Wedi ei bostio ar Dydd Mercher 6 Rhagfyr 2023
Mae grŵp o fentrwyr wedi cymryd rhan mewn cwrs newydd sy’n cefnogi pobl ifanc mewn busnes yn Nhorfaen.
Mae’r mentrwyr, sydd rhwng 18 a 30 oed, wedi cymryd rhan yn y rhaglen wyth wythnos o hyd a drefnwyd gan dîm ymgysylltiad busnes Cyngor Torfaen.
Dyma’r tro cyntaf i Glwb 5-9 Torfaen ganolbwyntio ar bobl ifanc, gan ymdrin â phynciau fel gwerthiant a marchnata, cyllid a chyflwyno syniadau.
Dywedodd Yvette Viner, 30, o Gwmbrân, perchennog Yvette Viner Jewellery: "Sefydlais i fy musnes yn gwneud gemwaith o fetelau gwerthfawr yn 2019 ond roedd yn fwy o hobi na dim.
"Mae’r cwrs yma wedi rhoi hyder i mi ac wedi fy nghyffroi digon i mi adeiladu fy musnes."
Yfory, bydd y mentrwyr yn cael cyfle i ddangos eu syniadau i gynrychiolwyr busnes mewn digwyddiad arbennig yng Ngwesty Parkway yng Nghwmbrân.
Ymhlith y syniadau busnes mae cynlluniau ar gyfer caffi chwarae i blant, therapi harddwch figanaidd, bar a mannau lletygarwch, llythrennedd corfforol i blant, golygu a chyhoeddi a gemwaith crisial a chynhyrchion hunanofal.
Dywedodd y Cynghorydd Jo Gauden, yr Aelod Gweithredol dros yr Economi, Sgiliau ac Adfywio: "Rwy’n edrych ymlaen at glywed am eu syniadau cyffrous a chael fy ysbrydoli gan eu hangerdd a’u brwdfrydedd.
"Bydd y bobl ifanc yma’n berchnogion busnes ac yn gyflogwyr y dyfodol ac, fel cyngor, rydym yn edrych ymlaen at eu cefnogi wrth i’w busnesau ddatblygu."
Ychwanegodd Hope Weyman, o’r cwmni arloesi busnes, Welsh ICE: "Mae cydweithio gyda Chyngor Torfaen gyda’r Clwb 5-9 i fentrwyr ifanc o dan 30 oed wedi bod yn werth chweil iawn.
"Mae’r synergedd o fewn yr ecosystem fach yma’n creu rhwydwaith o gefnogaeth a chyngor, gan ddangos y posibiliadau a’r arloesi sydd eto i’w gwireddu.
"Mae Welsh ICE yn falch o fedru cyfrannu at ddatblygiad sgiliau mentergar yn Nhorfaen, gan lunio tirwedd fusnes fywiog yng nghalon y cymoedd."
Mae’r Clwb 5-9 wedi ei ariannu gan Gronfa Ffyniant Cyffredin Llywodraeth y DU ac mae’n cynnwys aelodaeth flynyddol o Lais Busnes Torfaen.
Mae Cronfa Ffyniant Cyffredin y DU yn faen canolog yn agenda Ffyniant Bro Llywodraeth y DU ac mae’n rhoi £2.6 biliwn o arian ar gyfer buddsoddiad lleol erbyn Mawrth 2025. Bwriad y Gronfa yw cynyddu balchder mewn lle a chynyddu cyfleoedd bywyd ledled y DU, gan fuddsoddi mewn cymunedau a lle, cefnogi busnesau lleol a phobl a sgiliau.
I wybod sut gall Cyngor Torfaen helpu eich busnes, cysylltwch â Chysywllt Busnes Torfaen trwy businessdirect@torfaen.gov.uk.