Gofalwyr ifanc

Pwy rydyn ni'n eu cefnogi?

Mae Gwasanaeth Gofalwyr Ifanc Torfaen yn cefnogi gofalwyr di-dâl dan 18 oed. Mae Llywodraeth Cymru yn diffinio gofalwyr ifanc yn ‘blant a phobl ifanc sy’n helpu i ofalu am aelod o’r teulu sy’n sâl, yn anabl, sydd â phroblemau iechyd meddwl neu’r rheiny y mae camddefnyddio sylweddau wedi effeithio arnynt’.

Pa gefnogaeth sydd ar gael?

Mae gan gynghorau gyfrifoldeb am les gofalwyr ifanc a rhaid iddynt sicrhau eu bod yn derbyn y gefnogaeth angenrheidiol. Yn Nhorfaen, rydym yn cydnabod y rôl bwysig y mae gofalwyr ifanc yn ei chwarae ac rydym yn darparu cefnogaeth a chyfleoedd hamdden i alluogi gofalwyr ifanc i gymryd rhan mewn gweithgareddau a chysylltiadau cymdeithasol sy'n briodol i'w hoedran..

Ar hyn o bryd mae Gwasanaeth Gofalwyr Ifanc Torfaen yn cefnogi dros 140 o ofalwyr ifanc. Aseswyd anghenion y gofalwyr ifanc hyn ac mae cefnogaeth yn cael ei darparu. Gall y gefnogaeth gynnwys;

• Cefnogaeth un i un
• Grwpiau cymdeithasol
• Hyfforddiant
• Gweithgareddau Preswyl a theithiau
• Rhywun i siarad ag ef, er mwyn lleihau pryder, straen ac unigedd
• Seibiant o'u cyfrifoldebau gofalu ac i gwrdd â gofalwyr ifanc eraill

Gyda phwy arall y mae’r gwasanaeth yn gweithio?

Mae Gwasanaeth Gofalwyr Ifanc Torfaen yn gweithio mewn partneriaeth gyda’r:

• Gwasanaeth Ieuenctid
• Adran Chwarae Torfaen
• Adran Datblygu Chwaraeon
• Cyngor Ieuenctid Pont-y-pŵl
• Sefydliadau trydydd sector eraill gan gynnwys Ymddiriedolaeth Gofalwyr De Ddwyrain Cymru, Ymddiriedolaeth Bywyd Gwyllt Gwent a Honeypot, i gael canlyniadau gwell i'n gofalwyr ifanc.

Mae rhagor o fanylion am y partneriaethau uchod a pha gymorth sydd ar gael, yn ogystal â'r broses i gael mynediad i'r Gwasanaeth Gofalwyr Ifanc ar gael ar ein Taflen Wybodaeth i Bobl Ifanc.

I blentyn gael eich ystyried yn Ofalwr Ifanc, rhaid iddo fodloni’r 3 maen prawf a ganlyn:

1. Maent o dan 18 oed
2. Maent yn gofalu neu’n rhoi cefnogaeth sy'n mynd y tu hwnt i'r hyn y byddai'n rhesymol ei ddisgwyl i rywun o'u hoedran
3. Maent yn gofalu am rywun sydd ag anabledd, salwch, neu broblem sylweddol o ran camddefnyddio sylweddau

Mae'r meini prawf hyn yn gweithio gyda'i gilydd i sicrhau bod cymorth yn cael ei gyfeirio at blant y mae eu cyfrifoldebau gofalu yn cael effaith ystyrlon ar eu lles a'u bywyd bob dydd, gan eu gwahaniaethu oddi wrth blant sy'n rhoi cymorth nodweddiadol, sy'n briodol i'r oedran o fewn y teulu.

Os ydych chi'n weithiwr proffesiynol sy'n gweithio gyda phlentyn/teulu ac yn dymuno atgyfeirio at y Gwasanaethau Cymorth i Ofalwyr Ifanc, a fyddech cystal â llenwi Ffurflen Atgyfeirio ar gyfer Gofalwr Ifanc yn Nhorfaen a’i hanfon mewn e-bost at y Tîm Gofalwyr Ifanc yn youngcarers@torfaen.gov.uk

Cerdyn Adnabod Gofalwyr Ifanc (Cynllun Cerdyn)

Cerdyn adnabod â llun, dwy flynedd, am ddim, a gyhoeddir gan Gyngor Bwrdeistref Sirol Torfaen i ofalwyr ifanc dan 18 oedd yw’r Cerdyn Adnabod Gofalwyr Ifanc. Mae’n cadarnhau fod gan y deiliad gyfrifoldebau gofalu, gan eu helpu i gyflwyno eu hunain i bobl broffesiynol ym meysydd iechyd, gofal cymdeithasol ac addysg heb yr angen i esbonio manylion personol am eu rôl gofalu.

Mae’r cerdyn yn rhan o ddull Cymru gyfan a ariennir gan Lywodraeth Cymru a’i ddatblygu trwy bartneriaeth rhwng Ymddiriedolaeth Gofalwyr Cymru ac awdurdodau lleol, gyda’r bwriad o wella profiadau gofalwyr ifanc mewn gwasanaethau allweddol.