Pam ddewison ni’r pryd hwn?
Dewis Ein Disgyblion
NEWYDD AR GYFER 2026!!!! Ydych chi'n ddisgybl sy'n blasu’r pryd hwn am y tro cyntaf?
Rydyn ni eisiau eich adborth. Rhowch wybod i'r cogydd yn eich ysgol a/neu anfonwch neges trwy e-bost i louise.gillam@torfaen.gov.uk
Mae eich llais yn bwysig!
Dewis Ein Dietegydd
Mae ein Cig Eidion Barbeciw yn bryd ysgol blasus a maethlon, wedi'i wneud gyda chyfuniad cytbwys o friwgig cig eidion o safon uchel a briwgig Quorn, gan ddarparu ffynhonnell protein i gefnogi twf a datblygiad a lleihau'r cynnwys braster dirlawn o'i gymharu â rysáit gyda dim ond cig eidion. Caiff ei weini mewn saws tomato moethus gyda phupurau a winwns, gan roi digon o flas ochr yn ochr â fitaminau, mwynau a ffibr gwerthfawr.
Daw’r pryd hwn gyda thortilas crensiog wedi'u pobi yn y ffwrn, ac mae’n darparu egni sy'n llawn carbohydradau i danio boliau’r disgyblion a chadw eu ffocws trwy gydol y diwrnod ysgol.
Paratoir ein reis llysiau lliwgar gan ddefnyddio cyfuniad 50/50 o reis gwyn a grawn cyflawn, gan roi hwb i’r ffibr a chadw blas a gwead sy'n addas i blant. Mae pob dogn yn cynnwys dogn blant lawn o lysiau cymysg, gan helpu i gynyddu’r llysiau a chyfrannu fitaminau a mwynau pwysig.
Caiff y pryd cytbwys hwn ei weini gyda salad ffres a llysiau ychwanegol, gan gynnig amrywiaeth o faetholion o bob un o'r grwpiau bwyd a helpu disgyblion i weithio tuag at eu 5 y dydd a mwynhau cinio blasus a boddhaol ar yr un pryd. Mae’r dewis iachus hwn yn cyfuno protein braster isel, grawn cyflawn a digon o lysiau, ac yn cefnogi twf a dysgu iach.
Prydau Ysgol Cynaliadwy
Cynhwysion o Ansawdd Da, o Ffynhonnell Gyfrifol
Gwneir elfen cig eidion y pryd hwn gan ddefnyddio briwgig cig eidion sydd â Gwarant Tractor Coch y DU. Mae safonau Tractor Coch yn darparu sicrwydd wedi'i archwilio'n annibynnol sy'n cwmpasu meysydd fel lles anifeiliaid, diogelwch bwyd, y gallu i olrhain a diogelu'r amgylchedd. Trwy gaffael ar gig eidion â gwarant o Brydain, rydyn ni’n cefnogi ffermio ym Mhrydain ac yn darparu hyder yn nharddiad y cynhwysion a ddefnyddir yn ein prydau ysgol a’u hansawdd.
Effaith Garbon Is, Yr Un Blas Gwych
Mae cig eidion yn cael ei gydnabod fel cynhwysyn bwyd sy'n allyrru nwyon tŷ gwydr cymharol uchel. Er mwyn helpu i leihau effaith amgylcheddol y pryd hwn, rydyn ni wedi ail-greu’r rysáit i gynnwys 40% o friwgig Quorn ochr yn ochr â 60% o friwgig cig eidion. Mae gan Quorn ôl troed carbon sylweddol is na chig eidion, ac amcangyfrifir y bydd y newid syml hwn yn lleihau ôl troed carbon elfen briwgig y pryd tua 39%, tra'n cynnal y blas, y gwead a’r ansawdd maethlon y mae disgyblion yn eu mwynhau.