Dewch i gael blas ar Lwybr Bwyd nesaf Torfaen!
Rhwng dydd Llun 3 a dydd Gwener 14 Awst, bydd busnesau lleol, ffermwyr a grwpiau cymunedol yn cynnal cyfres o weithgareddau a digwyddiadau mewn gwahanol leoliadau ar draws y fwrdeistref.
Gan adeiladu ar lwyddiant y Llwybr Bwyd Torfaen cyntaf erioed y llynedd, gyda dros 800 o bobl yn bresennol, bydd y digwyddiad eleni’n cynnig hyd yn oed mwy o gyfleoedd i archwilio bwyd a diod lleol, gyda phartneriaid newydd yn helpu i ehangu'r rhaglen.
Un o'r busnesau newydd sy'n cymryd rhan eleni yw Paint and Pause, o Ganolfan Celfyddydau Llantarnam Grange, a fydd yn cynnal prynhawn o greadigrwydd, sgwrs ac ymwybyddiaeth ofalgar yn archwilio atgofion, straeon a thraddodiadau sy'n gysylltiedig â bwyd, teulu a lles trwy gelf.
Dywedodd y perchennog Amy Rose: "Fel busnes lles lleol newydd, rwy'n falch iawn o fod yn rhan o Lwybr Bwyd Torfaen eleni.
"Trwy Paint & Pause, rydym yn gobeithio annog pobl i bwyllo, cysylltu ag eraill ac archwilio sut y gall bwyd, celf a chreadigrwydd gefnogi lles wrth ddathlu'r cyfoeth o gynnyrch lleol a thraddodiadau bwyd sydd gennym yma yn Nhorfaen."
Dywedodd y Cynghorydd Sue Morgan, Aelod Gweithredol dros Gynaliadwyedd a Gwastraff: "Rydym yn falch iawn o ddod â'r rhaglen yn ôl am yr ail flwyddyn yn olynol ac rydym yn edrych ymlaen at groesawu pobl o bob oed i fwynhau'r amrywiaeth eang o weithgareddau a phrofiadau sydd ar gael.
"Hoffem ddiolch i holl aelodau'r bartneriaeth bwyd, busnesau lleol, sefydliadau cymunedol a phartneriaid cyflenwi sydd wedi dod at ei gilydd i wneud y rhaglen eleni yn bosibl.”
Mae digwyddiadau’r Llwybr Bwyd yn cynnwys:
- “Does dim bananas!” – archwiliwch hanes dogni yn Amgueddfa Torfaen ym Mhont-y-pŵl, rhwng 11am - 1pm a 1.30pm – 3.30, ddydd Mawrth 4 Awst a dydd Mawrth 11 Awst
- Caws i mi! – crëwch eich siytni a’ch cyffeithiau eich hun cyn mwynhau sesiwn blasu gyda chynhyrchwyr caws lleol yng Nghyngor Cwmbrân, o 2pm ddydd Gwener, 7 Awst.
- Blas ar Dorfaen – noson flasu llwybr bwyd yng Ngwastraff Sero Torfaen rhwng 6pm-7pm, ddydd Mercher, 5 a Dydd Mercher 12 Awst.
I weld beth arall sy’n digwydd ac i gadw lle os oes angen, ewch i www.food4growthtorfaen.co.uk/events (yn agor mewn tab newydd) neu dilynwch dudalen Facebook Food4Growth (yn agor mewn tab newydd).
Daw Llwybrau Bwyd Torfaen trwy gymorth y Rhaglen Gwytnwch Bwyd, a ariennir gan Gronfa Ffyniant Gyffredin Llywodraeth y DU.