Mae tri darllenydd ifanc wedi cael eu gwobrwyo am eu hymdrechion wedi iddynt gymryd rhan yn Sialens Ddarllen yr Haf eleni.
Roedd dros 900 o blant, rhwng pedair ac 11 oed, wedi cofrestru i ddarllen neu wrando ar chwech neu fwy o lyfrau llyfrgell dros yr haf, gan gasglu gwobrau fel sticeri, cylchgronau a bagiau llyfrau ar hyd y ffordd.
Hallie, disgybl o Flwyddyn 1 yn Ysgol Gynradd Croesyceiliog, yw’r enillydd eleni, ac mae wedi cael tocyn rhodd gwerth £100 ar ôl i'w henw gael ei dynnu ar hap o blith enwau pawb a gwblhaodd y Sialens.
Roedd y thema eleni, Cyfrolau’n Canu, yn dathlu creadigrwydd a hunanfynegiant trwy lyfrau wedi'u hysbrydoli gan gerddoriaeth, dawns ac adrodd straeon.
Enillodd disgybl o Flwyddyn 2, sef Arabella, o Ysgol Gynradd Cwmffrwdoer, ac Isaac, disgybl ym Mlwyddyn 1 yn Ysgol Gynradd Griffithstown, docynnau sinema hefyd ar ôl cael eu dewis ar hap o blith y plant a oedd wedi cofrestru ar gyfer y Sialens.
Efallai bod y Sialens drosodd am eleni, ond mae llawer mwy yn digwydd yn Hybiau Cymunedol a Llyfrgelloedd Torfaen.
Yn ystod hanner tymor mis Hydref, bydd llyfrgelloedd ym Mlaenafon, Cwmbrân a Phont-y-pŵl yn cyflwyno cyfres o sesiynau stori a chrefft a byddant yn croesawu Experimental Science, sy'n cynnal sesiynau Gwyddoniaeth Ddychrynllyd.
Gall trigolion hefyd alw heibio trwy gydol y flwyddyn am gymorth technegol a rhaglen gynyddol o ddigwyddiadau cymunedol, yn ogystal ag archebu diod boeth o Coffi Cart sydd newydd ei lansio.
Ac nid llyfrau yn unig sydd ar gael i'w benthyg; mae’r eitemau’n cynnwys offer chwaraeon ac iwcalilis hefyd.
Meddai’r Cynghorydd Richard Clark, Aelod Gweithredol dros Blant, Teuluoedd ac Addysg, "Llongyfarchiadau i Hallie, Arabella ac Isaac, ac i bawb a gymerodd ran yn y Sialens eleni. Mae'n wych gweld cymaint o bobl ifanc yn darganfod llyfrau ac yn eu mwynhau.
"Mae darllen yn helpu i fagu hyder, creadigrwydd a chariad gydol oes at ddysgu, ac mae ein llyfrgelloedd yn lleoedd gwych i barhau â'r daith honno. Gyda chymaint mwy na llyfrau ar gael, buaswn yn annog pawb i ymweld â'u llyfrgell leol."
Ddim yn aelod o'r llyfrgell eto? Gallwch ymaelodi’n rhad ac am ddim a gallwch gofrestru yn eich llyfrgell leol.
Am ragor o wybodaeth am weithgareddau a gwasanaethau, ewch i'ch llyfrgell leol, dilynwch Torfaen Libraries ar Facebook neu ffoniwch 01633 647676.