Os ydych chi'n rhentu eich cartref gan landlord preifat yn Nhorfaen, hoffai tîm tai'r cyngor glywed am eich profiadau.
Gyda'r galw am gartrefi’n yn parhau i gynyddu, rydym am sicrhau bod y sector rhentu preifat lleol yn opsiwn fforddiadwy da i drigolion sy'n chwilio am gartref.
Bydd eich adborth yn helpu i lunio Strategaeth newydd ar gyfer y Sector Rhentu Preifat 2026–2031 i nodi gweledigaeth glir i wneud tai rhent preifat yn fwy fforddiadwy, hygyrch a diogel i breswylwyr.
Er bod y sector rhentu preifat yn Nhorfaen yn llai na rhannau eraill o Gymru, mae'n chwarae rhan bwysig wrth ddiwallu anghenion lleol am gartrefi.
Gyda'r galw am dai fforddiadwy yn parhau i gynyddu, mae'r Cyngor wedi ymrwymo i sicrhau bod rhentu preifat yn Nhorfaen yn deg, yn gefnogol ac yn cynnig opsiwn tai cynaliadwy i breswylwyr.
Bydd y strategaeth yn archwilio'r heriau y mae llawer o rentwyr preifat yn eu hwynebu, gan gynnwys fforddiadwyedd a diogelwch, ac yn clywed profiadau trigolion lleol i helpu i lunio cymorth a pholisi yn y dyfodol.
Bydd hefyd yn nodi sut y bydd y cyngor yn gweithio ochr yn ochr â landlordiaid lleol, gan gydnabod eu rôl hanfodol i gynnal sector rhentu preifat o ansawdd uchel.
Mae'r ymgynghoriad, sy'n rhedeg rhwng Mawrth 6 ac Ebrill 10, yn dilyn ymgysylltiad â landlordiaid preifat, i helpu i lunio'r ffordd y mae'r cyngor yn gweithio gyda nhw i ddatgloi'r potensial i breswylwyr. Mae llety rhent preifat yn chwarae rhan hanfodol a chanolog wrth ddiwallu anghenion a gofynion tai cymunedau Torfaen.
Mae tair sesiwn alw-heibio y gallwch fynd iddynt i sgwrsio â'r tîm tai am eich profiadau:
- Canolfan Treftadaeth Blaenafon – Dydd Mawrth, 17eg Mawrth 10am-2pm
- Canolfan Hamdden Pont-y-pŵl – Dydd Mawrth 31ain Mawrth, 9:30am-1pm
- Llyfrgell Cwmbrân – Dydd Iau 2il Ebrill 10am-2pm
Dywedodd y Cyng. David Daniels, Aelod Gweithredol dros Wasanaethau Oedolion a Thai: "Mae'r sector rhentu preifat yn Nhorfaen yn llai nag awdurdodau lleol eraill yng Nghymru, gyda dim ond 11 y cant o aelwydydd yn rhentu’n breifat, o'i gymharu â 24 y cant sy'n byw mewn tai cymdeithasol.
"Hoffem gefnogi landlordiaid a thenantiaid preifat i sicrhau bod rhentu preifat yn opsiwn diogel a fforddiadwy i bobl nad ydynt yn gallu fforddio prynu eiddo ond nad ydynt eisiau aros i gael cartref gan ddarparwr tai cymdeithasol."
I gael gwybodaeth ynglŷn â sut y gall y cyngor gefnogi tenantiaid rhent preifat, ewch at ein gwefan.
Nodwch: mae’r arolwg hwn ar agor dim ond i drigolion sy’n rhentu’n breifat yn Nhorfaen.