Mae disgwyl i waith i wella canol tref Pont-y-pŵl ddigwydd fel rhan o fenter newydd Caru Torfaen / Trefi Gyda'n Gilydd.
O'r wythnos nesaf ymlaen, bydd timau'r cyngor yn gwneud gwaith glanhau, cynnal a chadw a gwelliannau amgylcheddol helaeth ar hyd Crane Street a The Link, Commercial Street a George Street, yn dilyn enwebiadau gan drigolion.
Daw’r gwaith i ben gyda diwrnod gweithredu cymunedol ddydd Sadwrn 15 Awst, pan fydd busnesau, gwirfoddolwyr a thrigolion lleol yn ymuno â swyddogion y cyngor i roi trawsnewidiad cyflym ar hyd Stryd y Crane, The Link (ardal gyfagos i Tesco), Commercial Street a George Street sydd wedi ennill pleidlais fel yr ardaloedd yng nghanol y dref sydd angen sylw fwyaf.
Bydd pobl ifanc hefyd yn cymryd rhan drwy weithio gydag artistiaid i greu a phaentio murlun ar y byrddau o amgylch Eglwys Sant Iago sy'n cael ei hadnewyddu.
Mae'r rhaglen Trefi Gyda'n Gilydd yn rhan o ddull newydd Bargen Torfaen y cyngor o weithio ochr yn ochr â chymunedau. Bydd timau'r cyngor yn gweithio gyda busnesau, grwpiau gwirfoddol a phartneriaid, gan gynnwys Heddlu Gwent, i fynd i'r afael ag ardaloedd trafferthus yn rheolaidd.
Mae yna hefyd gynlluniau ar gyfer gwelliannau i arosfannau bysiau ledled y fwrdeistref a chyfres o furluniau o amgylch y fwrdeistref i annog ymwelwyr ac atal ymddygiad gwrthgymdeithasol.
Dywedodd y Cyng. Joanne Gauden, Aelod Gweithredol Torfaen dros yr Economi, Sgiliau ac Adfywio: "Mae gan canol ein trefi'r potensial i fod wrth galon ein cymunedau eto, ond mae angen dull cyson a chydgysylltiedig arnynt.
"Rydym wedi gwrando ar fusnesau a thrigolion sy'n dweud eu bod yn rhwystredig gydag ymddangosiad canol trefi Pont-y-pŵl a Blaenafon yn arbennig, a'r siopau gwag.
"Er bod gan y cyngor rôl sylweddol i'w chwarae wrth fynd i'r afael â'r materion hynny, ni allwn ddatrys yr holl broblemau. Mae angen cymunedau, unigolion a landlordiaid i ddangos eu bod yn caru lle maen nhw'n byw ynddo a chymryd camau cadarnhaol i ofalu amdano.
"Gyda'n gilydd gallwn drawsnewid canol ein trefi i fod yn ardaloedd lle mae pobl eisiau ymweld â nhw ac mae busnesau eisiau buddsoddi ynddynt."
Dywedodd Dyl Delaney, Cadeirydd Tasglu Cymunedol Pont-y-pŵl: "Mae'r tasglu yn cynnwys cynrychiolwyr o bum grŵp gwirfoddol ac mae'n ymgorffori ethos gweithio ar y cyd.
"Dyna pam rydyn ni mor falch ein bod wedi bod yn rhan o'r cyngor o'r cychwyn cyntaf wrth gynllunio diwrnod gweddnewidiad y dref.
"Mae digwyddiadau fel hyn yn dangos Bargen Torfaen ar ei orau, gan ddod â thrigolion, gwirfoddolwyr a sefydliadau lleol ynghyd i wneud gwahaniaeth gwirioneddol yn ein cymuned. Boed i hynny barhau"
I ymuno â diwrnod gweithredu cymunedol Pont-y-pŵl, ewch i Farchnad Dan Do Pont-y-pŵl ar y 15fed o Awst am 9am.
Bydd digwyddiad nesaf Trefi Gyda’i Gilydd ym Mlaenafon fis Medi ac rydym yn gofyn am awgrymiadau am strydoedd i’w targedu.
Gallwch gwrdd â thîm Trefi Gyda’i Gilydd yn nigwyddiad haf hwyr Cyngor Tref Blaenafon ddydd Sadwrn, Medi 5.