Mae ysgolion yn paratoi at Eisteddfod Genedlaethol yr Urdd y flwyddyn nesaf a fydd yn cael ei chynnal yng Ngwent.
Bydd Eisteddfod yr Urdd Bro'r Wenynen Gwent yn cynnwys dros 400 o gystadlaethau celf a diwylliannol ac mae disgwyl iddi ddenu dros 100,000 o geisiadau o bob rhan o Gymru.
Yr wythnos hon, fe fu 10 ysgol gyfrwng Saesneg sydd â diddordeb mewn cymryd rhan yn y digwyddiad yn cwrdd ag aelodau o Eisteddfod yr Urdd yn Ysgol Gymraeg Cwmbrân, ac mae pedair arall yn awyddus i gymryd rhan ochr yn ochr ag ysgolion cyfrwng Cymraeg y Fwrdeistref.
Meddai’r dirprwy bennaeth, Catrin Passmore: "Rydyn ni’n gyffrous iawn fod Eisteddfod yr Urdd yn dod i'n rhanbarth ni - mae'n gyfle gwych i blant a phobl ifanc o bob ysgol i gael eu trwytho yn niwylliant Cymru a’i thraddodiadau, waeth a ydyn nhw'n siarad yr iaith ai peidio.
"Buasen ni wrth ein bodd i weld ein holl ysgolion yn cymryd rhan ac yn dod â llawer o fedalau nôl! Mae yna lawer o help ar gael i blant sydd eisiau perfformio yn Gymraeg, yn ogystal â dysgwyr Cymraeg, a chystadlaethau eraill lle nad oes angen Cymraeg llafar.
"Rydyn ni'n edrych ymlaen at gynrychioli Torfaen a gallwn ni ddim aros i berfformio ochr yn ochr ag ysgolion lleol eraill!"
Eisteddfod yr Urdd yw gŵyl ieuenctid flynyddol fwyaf Cymru ac mae'n cynnwys cystadlaethau canu, llefaru, perfformio a dawns, yn ogystal â chategorïau amgen gan gynnwys coginio, gwallt a harddwch a chomedi.
Cynhelir Eisteddfod yr Urdd Bro'r Wenynen Gwent yn Nhŷ Tredegar, yng Nghasnewydd, rhwng 29 Mai a 3 Mehefin, 2027. Mae'r enw’n anrhydeddu Arglwyddes Llanofer, a oedd yn cael ei hadnabod fel Gwenynen Gwent, am iddi weithio mor galed i hyrwyddo'r Gymraeg a thraddodiadau Cymru.
Cynhelir y rhagbrofion rhwng mis Chwefror a mis Mawrth, a bydd Eisteddfod Pont-y-pŵl eleni, a drefnir gan Gyngor Cymuned Pont-y-pŵl, hefyd yn cynnwys categorïau'r Eisteddfod.
Bydd ysgolion yn cynnal digwyddiadau i godi arian dros y misoedd nesaf i helpu gyda'r gost o gynnal y digwyddiad. Un o’r ysgolion fydd yn cyfrannu at yr ymgyrch yw Ysgol Gymraeg Cwmbrân, a fydd yn cynnal Noson gydag Elvis, yn y Cwt Gwyn, yng Nghoed Eva ar 16 Hydref. Mae tocynnau'n costio £12.50 - cysylltwch â Catrin Passmore yn Ysgol Gymraeg Cwmbrân.
Mae aelodaeth yr Urdd yn costio £13.50 yr un am y flwyddyn. Mae tocynnau ar gyfer y prif ddigwyddiad dros Wythnos Sulgwyn yn mynd ar werth yn y gwanwyn. Am ragor o wybodaeth am y digwyddiad, ewch i wefan Eisteddfod yr Urdd (yn agor mewn tab newydd).