Gall trigolion ar draws Torfaen gael mynediad at fwy o ddillad chwaraeon am ddim nawr, diolch i rodd hael gan Glwb Rygbi'r Dreigiau i Ystafell Gitiau Gymunedol Torfaen.
Mae'r Ystafell Gitiau Gymunedol, sydd mewn sawl lleoliad ar draws Torfaen, yn agored i unrhyw un sydd eisiau dillad neu offer chwaraeon, gan gynnig mynediad am ddim i gitiau pêl-droed a rygbi, esgidiau chwaraeon, leotards gymnasteg a mwy.
Lansiwyd y fenter ym mis Awst 2024, gan ein helpu i chwalu rhwystrau ariannol sy’n atal pobl rhag cymryd rhan mewn chwaraeon a gweithgarwch corfforol, a chefnogi teuluoedd sy'n wynebu pwysau parhaus costau byw.
Mae Clwb Rygbi'r Dreigiau yn cael rhoddion o ddillad ac offer chwaraeon a garwyd unwaith, yn rheolaidd, trwy gynllun Dragons Kit Locker ac mae'n sicrhau bod yr eitemau hyn o fudd i'r cymunedau maen nhw’n eu gwasanaethu.
Yr wythnos hon, rhoddodd y clwb sawl bag o ddillad ac esgidiau chwaraeon i blant i'r Ystafell Gitiau Gymunedol ac mae'n bwriadu cyfrannu’n rheolaidd.
Daeth y Cynghorydd Fiona Cross i wybod am y cyfle drwy Wayne Furley, Prif Hyfforddwr Rygbi Cyffwrdd Cwmbrân Dragons Allstars - sy'n glwb cyswllt i Glwb Rygbi’r Dreigiau.
Meddai’r Cynghorydd Cross, Aelod Gweithredol Cyngor Torfaen dros Gymunedau:
"Rydyn ni’n ddiolchgar dros ben i Glwb Rygbi'r Dreigiau am y rhodd hael hon, a fydd yn helpu mwy o bobl ifanc i chwarae rygbi trwy roi mynediad i'r offer sydd ei angen arnynt. Trwy ailddefnyddio cit chwaraeon o safon dda, mae'r cynllun yn cefnogi teuluoedd ac yn lleihau gwastraff.
"Mae hefyd yn enghraifft wych o Fargen Torfaen ar waith, gyda busnesau, grwpiau cymunedol, gwirfoddolwyr a gwasanaethau cyhoeddus yn cyfuno’u hymdrechion i wella cyfleoedd i bobl leol."
Darperir yr Ystafell Gitiau Gymunedol mewn partneriaeth â Thîm Iechyd, Chwaraeon a Ffitrwydd Cyngor Torfaen, Cyngor Tref Blaenafon, Cyngor Cymuned Cwmbrân, Banc Bwyd y Cwm Dwyreiniol, Partneriaeth Garnsychan, Foodshare a Circulate Blaenafon.
Meddai David Watts, arweinydd Cynaliadwyedd Clwb Rygbi’r Dreigiau: "Rydyn ni’n falch iawn o gefnogi'r fenter gymunedol wych hon gyda dillad ac esgidiau chwaraeon ychwanegol i blant, yn syth o’n Locer Citiau.
"Dylai teuluoedd allu cael mynediad at y cit sydd ei angen arnynt heb fod cost yn rhwystro’u gallu i gymryd rhan. Trwy rannu eitemau o ansawdd da, gallwn gefnogi mwy o bobl ar draws Torfaen a defnyddio’r cit am gyfnod hirach. Edrychwn ymlaen at gyfrannu'n rheolaidd."
Os oes gennych chi ddillad ac offer chwaraeon sydd ddim yn cael eu defnyddio mwyach ond sydd â digon o fywyd ar ôl ynddynt, mae yna nifer o bwyntiau rhoi wedi'u sefydlu ar draws y Fwrdeistref.
Am ragor o wybodaeth am roddion neu leoliadau ac oriau agor Ystafelloedd Citiau Cymunedol, ewch i https://connecttorfaen.org.uk (yn agor mewn tab newydd)