Mae Uned Drochi Cymraeg Torfaen, 'Carreg Lam', yn dathlu carreg filltir wrth iddi groesawu ei 100fed dysgwr i'w rhaglen drochi yn y Gymraeg.
Dros 12 wythnos, mae'r ganolfan arbenigol ym Mhont-y-pŵl yn darparu cymorth Cymraeg dwys, thematig i helpu plant oedran cynradd i drosglwyddo i addysg cyfrwng Cymraeg neu gryfhau eu sgiliau presennol.
Dechreuodd Ivor Edwards, sy'n saith oed, ei daith addysg Gymraeg yn llawn amser gyda Charreg Lam ym mis Medi, ar ôl trosglwyddo o ysgol cyfrwng Saesneg.
Dywedodd: "Rydw i wedi cael llawer o hwyl hyd yn hyn. Rwyf wrth fy modd yn darllen ac yn chwarae’r holl gemau hwyliog. Mae'n fy helpu i ddysgu sut i siarad Cymraeg yn dda iawn."
Mae Carreg Lam, a agorodd yn 2023, yn cefnogi plant rhwng 7 ac 11 oed drwy gynnig llwybr pwrpasol i addysg gyfrwng Cymraeg i rieni sydd eisiau i'w plentyn ddysgu drwy'r Gymraeg.
Mae'r ganolfan yn cynnig cyrsiau trochi â ffocws wedi'u hadeiladu o amgylch themâu bywyd go iawn fel 'Y Caffi' a'r 'Parc' i gyd wedi'u cynllunio i roi hwb i hyder plant wrth ddefnyddio'r Gymraeg gan eu helpu i gael mynediad at Gwricwlwm Cymru.
Mae'n cymysgu hyfforddiant iaith wedi'i dargedu â gweithgareddau ymarferol, teithiau a dysgu cymdeithasol i gyflymu hyfedredd llafar a pharodrwydd ystafell ddosbarth.
Dywedodd mam Ivor, Tammy: "Rydyn ni mor falch o'i llwyddiannau hyd yn hyn. Mae wedi dysgu llawer o eirfa Gymraeg. Mae Carreg Lam yn rhoi'r sgiliau iaith i'n plentyn ymuno ag ysgol Gymraeg."
Dywedodd y Dr. Matthew Williamson-Dicken, Pennaeth y ganolfan: "Mae'n bleser croesawu ein 100fed dysgwr i Garreg Lam! Mae'r garreg filltir hon yn dathlu pob plentyn a theulu sydd wedi mynychu ein canolfan, ac rydym yn edrych ymlaen at groesawu'r 100 nesaf.
"Mae Carreg Lam yn parhau i fod yn ymrwymedig i gefnogi cyfraniad Torfaen at uchelgeisiau cenedlaethol yn y Gymraeg drwy baratoi disgyblion i ffynnu mewn lleoliadau cyfrwng Cymraeg a mwynhau dyfodol dwyieithog - gan brofi nad yw byth yn rhy hwyr i ddysgu Cymraeg."
Dywedodd y Cyng. Richard Clark, Aelod Gweithredol Cyngor Torfaen dros Blant, Teuluoedd ac Addysg: "Fel cyngor, rydym yn falch o hyrwyddo plant, pobl ifanc a theuluoedd fel y gallan nhw ffynnu. Mae llwyddiant Carreg Lam wrth groesawu ei 100fed dysgwr yn adlewyrchiad pwerus o'n hymrwymiad i ehangu cyfleoedd addysgol drwy'r Gymraeg.
"Drwy gefnogi rhaglenni trochi fel hyn, rydym nid yn unig yn helpu disgyblion i drosglwyddo'n hyderus i addysg cyfrwng Cymraeg, ond hefyd yn cyfrannu'n ystyrlon at weledigaeth Cymraeg 2050 Llywodraeth Cymru o filiwn o siaradwyr Cymraeg."
Gall rhieni sy'n chwilio am wybodaeth am atgyfeiriadau, dyddiadau cyrsiau ac ymweliadau allgymorth gysylltu â Charreg Lam drwy e-bostio carreg-lam@torfaen.gov.uk neu drwy ymweld â gwefan y ganolfan www.carreg-lam.com