Wedi ei bostio ar Dydd Iau 16 Gorffennaf 2026
Mae cyfleusterau newydd gwerth £637,000 mewn clwb pêl-droed yng Nghwmbrân wedi'u hagor yn swyddogol, cyn dechrau'r tymor newydd.
Gwnaeth Clwb Pêl-droed Coed Efa gais am gyllid gan Sefydliad Pêl-droed Cymru a'r cyngor y llynedd ar gyfer ystafelloedd newid a llochesi newydd yn eu maes.
Mae'r clwb nawr yn gobeithio denu cyllid ychwanegol i wella'r maes parcio.
Dywedodd Paul Bielski, Cadeirydd Clwb Pêl-droed Coed Efa: "Mae cyrraedd y cam hwn wedi bod yn heriol ond yn hynod werth chweil. Rydyn ni eisoes wedi gweld cyn-chwaraewyr yn mynegi diddordeb mewn dychwelyd ar ôl gweld y gwelliannau, ac mae yna gyffro gwirioneddol am ddyfodol y clwb."
"Rydym yn hynod ddiolchgar i Sefydliad Pêl-droed Cymru, a roddodd 70 y cant o'r arian angenrheidiol, ac i'r cyngor am ddarparu cymorth ariannol ychwanegol."
Mae'r buddsoddiad, sydd wedi cynnwys cyllid o gyfraniadau datblygwyr a dalwyd i'r cyngor, hefyd wedi cynnwys draenio newydd ar gyfer yr ystafelloedd newid a'r ffensys.
Mae gan y clwb 46 oed naw tîm, tua 150 o aelodau a 27 o wirfoddolwyr.
Dywedodd y Cynghorydd Mandy Owen, Aelod Gweithredol dros yr Amgylchedd a agorodd y cyfleusterau’n swyddogol yr wythnos diwethaf: "Trwy ail-fuddsoddi cyfraniadau datblygwyr yn lleol, rydym wedi gallu darparu cyfleusterau modern a fydd o fudd i genedlaethau'r presennol a'r dyfodol o chwaraewyr, gwirfoddolwyr a thrigolion.
"Fel rhan o'n dull Bargen Torfaen, rydym wedi ymrwymo i weithio ochr yn ochr â sefydliadau cymunedol i'w helpu i gymryd rôl weithgar wrth reoli a gwella asedau lleol.
"Mae Clwb Pêl-droed Coed Efa’n enghraifft wych o sut y gall clybiau gefnogi cynaliadwyedd hirdymor cyfleusterau cymunedol wrth greu cyfleoedd i bobl fod yn egnïol, cysylltu ag eraill ac ymfalchïo yn eu hardal leol."
Daw'r agoriad swyddogol wrth i Gynllun Cyfleusterau Pêl-droed Lleol newydd i Dorfaen gael ei gyhoeddi.
Wedi'i ddatblygu gan Continuum Sport & Leisure mewn partneriaeth â Chymdeithas Bêl-droed Cymru, Sefydliad Pêl-droed Cymru, Cyngor Torfaen, clybiau pêl-droed lleol a rhanddeiliaid allweddol eraill, mae'r cynllun yn nodi gweledigaeth hirdymor ar gyfer cyfleusterau pêl-droed ledled y fwrdeistref.
Y nod yw cwrdd â'r galw cynyddol a gwella ansawdd, hygyrchedd a chynaliadwyedd cyfleusterau presennol. Am ragor o wybodaeth, cliciwch isod.
Cynllun Cyfleuster Pêl-droed Lleol