Maes 3G newydd yn agor yn Ysgol Uwchradd Cwmbrân

Mae maes 3G newydd o'r radd flaenaf wedi agor yn swyddogol yn Ysgol Uwchradd Cwmbrân.

Diolch i fuddsoddiad o £1.3 miliwn, mae’r prosiect wedi trawsnewid hen arwyneb redgra yr ysgol, ac mae bellach yn gyfleuster modern ar gyfer pob tywydd, sydd yn addas i ddisgyblion ac i’w hurio gan y gymuned.

Agorwyd y maes 3G newydd gan y Cynghorydd Anthony Hunt, Arweinydd Cyngor Torfaen, ac mae’n cynnwys arwyneb sydd wedi ei ardystio gan FIFA a World Rugby, llifoleuadau LED, ffensys newydd a rhwydi ar ben y pyst goliau.

Gall y cyfleuster newydd weithredu naill ai fel maes maint llawn neu ddwy ardal chwarae lai, gan gefnogi ystod o chwaraeon a gweithgareddau.

Defnyddiwyd deunydd a ailgylchwyd o'r hen arwyneb redgra i adnewyddu'r maes isaf, a fydd yn cael ei farcio ar gyfer hoci, a chodwyd ffens newydd ar hyd ei berimedr.

Mae cwrt tenis nad oedd yn cael ei ddefnyddio, hefyd wedi ei adnewyddu i fod yn gwrt gemau aml-ddefnydd.

Meddai Matthew Sims, Pennaeth, Ysgol Uwchradd Cwmbrân:

"Rydym yn falch iawn o agor y maes 3G newydd yn swyddogol. Bydd y cyfleusterau yn cynnig cyfleoedd gwych i'n disgyblion ddatblygu eu sgiliau chwaraeon a mwynhau bod yn actif, wrth fynd ati i gryfhau rôl yr ysgol fel canolbwynt i'r gymuned ehangach."

Roedd cyllid y prosiect yn cynnwys £1.2m gan Gronfa Ffyniant Gyffredin y DU, £65,000 gan Grant Ysgolion Bro Llywodraeth Cymru a £38,000 o gyfraniadau Adran 106 y Cyngor.

Dywedodd y Cyng. Anthony Hunt, Arweinydd Cyngor Torfaen: "Mae hwn yn fuddsoddiad sylweddol mewn chwaraeon, gweithgarwch corfforol a lles cymunedol yn Ysgol Uwchradd Cwmbrân. Trwy wella a moderneiddio'r cyfleusterau hyn, rydym yn creu ased cymunedol parhaol a fydd yn cefnogi cyfleoedd i gymryd rhan mewn chwaraeon am flynyddoedd lawer."

“Bydd disgyblion yn elwa ar y cyfleusterau trwy gydol y diwrnod ysgol, tra bydd clybiau, timau a thrigolion lleol yn cael cyfleoedd i'w defnyddio a chadw'n actif y tu allan i oriau ysgol.”

Mae'r cyfleusterau newydd ar gael i’w hurio gan y gymuned drwy wefan SchoolHire - https://schoolhire.co.uk/