Wedi ei bostio ar Dydd Gwener 27 Chwefror 2026
Mae arbenigwyr byd-enwog ar reoli darbodus wedi bod yn gweithio gyda busnesau gweithgynhyrchu lleol, diolch i fenter gan y Cyngor a Fforwm Economaidd Strategol Torfaen.
Mae Toyota Lean Management Centre, yng Nglannau Dyfrdwy, yn cynnig hyfforddiant wedi'i deilwra, diagnosteg fanwl a hyfforddiant i helpu busnesau i wella effeithlonrwydd a lleihau gwastraff.
Treuliodd chwe chwmni ddiwrnod yn y Ganolfan yn dysgu am y fframwaith gweithgynhyrchu darbodus a gweithiodd pedwar ohonynt gyda choetsiwr rheoli darbodus er mwyn deall sut i gymhwyso'r egwyddorion i'w busnesau.
Yn rhan o’r rhaglen a ariannwyd gan Gronfa Ffyniant Gyffredin y DU, cafodd Mark Lloyd, o Fitzgerald Plant Services, yng Nghwmbrân, hyfforddiant i ddod yn Hyrwyddwr Darbodus Toyota i gefnogi busnesau eraill.
Yr wythnos hon, cafodd cwmnïau eraill gyfle i ddysgu am ddull Rheoli Darbodus Toyota mewn Digwyddiad Gweithgynhyrchu Arloesi ar gyfer y Dyfodol yng Ngwesty'r Parkway, yng Nghwmbrân.
Ymhlith y siaradwyr roedd Arweinydd y Cyngor, y Cynghorydd Anthony Hunt, Nick Pearn, o Toyota Manufacturing UK, Mark Lloyd, o Fitzgerald Plant Services, a Kelly Howlett-Booth, Rheolwr Strategaeth Gweithgynhyrchu Uwch a Modurol Llywodraeth Cymru.
Meddai’r Cynghorydd Anthony Hunt, Arweinydd y Cyngor: "Rydyn ni wedi ymrwymo i gefnogi twf a chydnerthedd ein sector gweithgynhyrchu lleol.
"Mae dull Rheoli Darbodus Toyota yn cynnig dulliau ymarferol, profedig i helpu busnesau i symleiddio eu prosesau, lleihau gwastraff a gwella cynhyrchiant.
"Trwy fabwysiadu'r egwyddorion hyn, gall ein gweithgynhyrchwyr ddod yn fwy cystadleuol, yn fwy cynaliadwy a chael eu harfogi’n well i ymateb i ofynion newidiol y farchnad. Bydd hyn yn helpu i gryfhau swyddi lleol a llwyddiant economaidd hirdymor ar gyfer ein cymunedau."
Gall cwmnïau sydd â diddordeb mewn dysgu mwy am ddull Rheoli Darbodus Toyota - gan gynnwys cyllid ar gyfer rhaglenni’r dyfodol, gysylltu â Chanolfan Arloesi Springboard trwy sicreception@torfaen.gov.uk