Ysgol Gyfun Gwynllyw
Mae Cyngor Bwrdeistref Sirol Torfaen, mewn cydweithrediad â Chyngor Sir Fynwy, Cyngor Dinas Casnewydd a Chyngor Bwrdeistref Sirol Blaenau Gwent, wedi bod yn gweithio tuag at ail-lunio, ailwampio ac ehangu Ysgol Gyfun Gwynllyw yn sylweddol er 2007.
Mae Ysgol Gyfun Gwynllyw mewn sefyllfa unigryw yng Nghymru, lle bo un ysgol yn gwasanaethu gymaint o awdurdodau addysg lleol. Mae dros hanner y disgyblion sy’n mynychu’r ysgol yn byw y tu allan i Dorfaen. Mae wedi bod yn cynnig Addysg Uwchradd Cyfrwng Cymraeg o ansawdd da i ardal Gwent Gyfan ers dechrau’r 1990au, ond mae pob un o’r pedwar awdurdod nawr wedi cydnabod bod angen iddynt fuddsoddi ar y cyd i wella safle’r ysgol ac mae cynlluniau ar y gweill i sicrhau bod anghenion y presennol a’r dyfodol yn cael eu diwallu yn y ffordd fwyaf cost effeithiol.
Mae gan bob plentyn yr hawl i gael ei addysgu trwy gyfrwng y Gymraeg yn unol â dymuniadau’r rhieni. Y nod yw sicrhau na chaiff unrhyw blentyn ei wrthod i Ysgol Gyfun Gwynllyw yn y tymor byr i ganolig, yn ogystal â gwella’r amgylchedd dysgu/addysgu, a gwella’r canlyniadau addysgol i ddisgyblion.
Cyfanswm y buddsoddiad yn yr ysgol fydd £12.1m, a ariennir ar y cyd gan y pedwar awdurdod addysg, ac a gynorthwyir â grant o £3m gan Lywodraeth Cynulliad Cymru. Mae’r cytundeb ariannu gydag awdurdodau eraill yn ddigynsail yn nhermau prosiectau cyfalaf, a’r gobaith yw y bydd yn arwain y ffordd ar gyfer mentrau ar y cyd rhwng awdurdodau lleol yn y dyfodol, yn enwedig yn nhermau addysg.
Nod y buddsoddiad hwn yn bennaf fydd cynyddu nifer y lleoedd yn yr ysgol i 1,100 o ddisgyblion trwy adeiladu dau floc parhaol newydd a chael gwared ar yr adeiladau y gellir eu datgymalu, a bydd hefyd yn mynd i’r afael â gwaith ailwampio brys ar y prif adeiladau sydd yno’n barod. Er bod y buddsoddiad yn un sylweddol, nid yw’n ddigon i ymdrin â holl anghenion yr ysgol, felly cytunwyd ar raglen flaenoriaeth sy’n canolbwyntio ar wella’r amgylchedd addysgol i’r disgyblion yn ogystal â’r staff.
